ރައީފާ ޢަބްދުލްވައްހާބް ވ. އެޓަރނީ ޖެނެރަލްގެ އޮފީސް

ހައިކޯޓުގެ ރަޖިސްޓްރާރ ފުރަތަމަ ނިންމީ މިއީ ހައިކޯޓަށް ބެލުމުގެ އިޚްތިޞާޞް ލިބިފައިވާ މައްސަލައެއް ނޫންކަމަށެވެ؛ އެ ނިންމުން މުރާޖަޢާކުރި ފަނޑިޔާރުންގެ އަޣްލަބިއްޔަތުން، މިއީ ހައިކޯޓުގެ އިޚްތިޞާޞްގެ ތެރޭގައި ހިމެނޭ މައްސަލައެއްކަމަށް ނިންމިއެވެ.

ލޯކަލް ގަވަރމަންޓް އޮތޯރިޓީން 25 ޖުލައި 2016 ގައި ޢަމަލުކުރަން ފެށި "ކައުންސިލުން ކުރާ ޤާނޫނާ ޚިލާފު ޢަމަލުތަކާއި އިސްލާޙީ ފިޔަވަޅުތައް ދަރަޖަކުރުމުގެ އުޞޫލު" ބާޠިލުކުރުމަށް އެދި ދެ ފަރުދަކު ހައިކޯޓަށް ދުސްތޫރީ މައްސަލައެއް ހުށަހެޅިއެވެ.

ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގެ 149 ވަނަ މާއްދާއިން އެލްޖީއޭއަށް ލިބިދެނީ ޚިލާފުތައް ޙައްލުކުރުމުގެ ބާރު އެކަނި ކަމަށާއި، ކައުންސިލަރުންނަށް ފިޔަވަޅު ދަރަޖަކުރުމުގެ ބާރު ލިބިދީފައި ނުވާތީ، މި އުޞޫލަކީ ޤާނޫނުއަސާސީގެ 274(ހ)، 94، 268 އާއި 2011/SC-C/30 އާ ޚިލާފު އުޞޫލެއްކަމަށް މައްސަލަ ހުށަހެޅި ފަރާތްތަކުން ބުނެފައިވެއެވެ. ދައުލަތުން ޤާނޫނުއަސާސީގެ 61 އާއި 271 އަށް ޙަވާލާދީފައިވެއެވެ.

ލޯކަލް ގަވަރމަންޓް އޮތޯރިޓީން ލާމަރުކަޒީ ޤާނޫނުގެ 149 ވަނަ މާއްދާގެ ދަށުން ހަދާފައިވާކަމަށް ބުނާ "ކައުންސިލުން ކުރާ ޤާނޫނާ ޚިލާފު ޢަމަލުތަކާއި އިސްލާޙީ ފިޔަވަޅުތައް ދަރަޖަކުރުމުގެ އުޞޫލު" އަކީ ޤާނޫނުން ބާރުލިބިގެން ޤާނޫނުގެ އިމުގެ ތެރެއިން ހަދާފައިވާ ޤަވާޢިދެއްތޯ، ނުވަތަ ޤާނޫނުއަސާސީއާ ޚިލާފު ބާޠިލު އުޞޫލެއްތޯ.

ލޯކަލް ގަވަރމަންޓް އޮތޯރިޓީގެ އުޞޫލު ޤާނޫނުއަސާސީއާ ޚިލާފު ބާޠިލު އުޞޫލެއްކަމަށް ކަނޑައެޅި

އުޞޫލަކީ ޤަވާޢިދުގެ މާނައިގައިވާ އެއްޗެއް ކަމާއި، ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގެ 149 ވަނަ މާއްދާއަކީ ކައުންސިލަރުންގެ މައްޗަށް ފިޔަވަޅު އެޅުމާ ގުޅޭ މާއްދާއެއް ނޫންކަމުން، އުޞޫލަކީ ޤާނޫނުން ބާރުލިބިގެން ޤާނޫނުގެ އިމުގެ ތެރެއިން ހަދާފައިވާ އެއްޗެއް ނޫނެވެ؛ އެހެންކަމުން ޤާނޫނުއަސާސީގެ 268 ވަނަ މާއްދާއާ ގުޅިގެން އެ އުޞޫލު ބާޠިލުކަމަށް ހައިކޯޓުން ނިންމިއެވެ.