2015/HC-A/310

ގއ. ދާންދޫ މެޖިސްޓްރޭޓް ކޯޓުން ނިންމީ، ކައުންސިލުގެ ނިންމުންތަކަކީ ޤާނޫނީ އިމުގެ ތެރެއިން ނިންމި ޞައްޙަ ނިންމުންތަކެއްކަމަށެވެ. އަދި އިސްތިއުނާފު ރައްދުވި ފަރާތް ރައީސްކަމަށް ޢައްޔަނުވެފައިވަނީ ޤާނޫނީ ހަމަތަކުގެ މަތިން ކަމަށް ކަނޑައެޅިއެވެ.

ކައުންސިލުގެ 44 ވަނަ ބައްދަލުވުމުގައި ރައީސްގެ މައްޗަށް އިތުބާރު ނެތްކަމަށް ނިންމިއެވެ. 45 ވަނަ ބައްދަލުވުމުގައި އިސްތިއުނާފު ރައްދުވި ފަރާތް ރައީސްކަމަށް ހޮވިއެވެ. އެ ވޯޓު ޞައްޙަ ނުވާނެކަމާއި، ރައީސަކު ޢައްޔަނުކޮށްފައިވާނަމަ އެއީ ބާޠިލް ނިންމުމެއްކަމަށް ލޯކަލް ގަވަރމަންޓް އޮތޯރިޓީން ސިޓީއަކުން އެންގިއެވެ. އެހެންކަމުން، ކައުންސިލުގެ ނިންމުންތަކުގެ ޞައްޙަކަން ކަނޑައަޅައިދިނުމަށް އެދި އެ ފަރާތުން މެޖިސްޓްރޭޓް ކޯޓަށް ދަޢުވާ ހުށަހެޅިއެވެ.

ދައުލަތުން ބުނީ، އިދާރީ ދާއިރާތަކަކީ މަރުކަޒީ ބާރުގެ ރަޤާބާއާއި އިޝްރާފުގެ ދަށުގައިވާ އިދާރާތަކެއްކަމަށް 2011/SC-C/30 ގައި ކަނޑައެޅި އުޞޫލަށް ދަށު ކޯޓުން ރިޢާޔަތް ނުކުރާކަމަށެވެ. އަދި ޙުކުމް ނެރުނީ ޤާނޫނުއަސާސީގެ 42 (ށ) އާ ޚިލާފަށްކަމަށާއި، ސަރކިއުލަރުގެ އިޖުރާއާތުތައް ވޯޓުގައި ނަގަހައްޓާފައި ނުވާކަމަށްވެސް ބުންޏެވެ.

ކައުންސިލްގެ ރައީސްގެ މައްޗަށް އިތުބާރު ނެތްކަމުގެ ވޯޓު ނަގައި އަލަށް ރައީސަކު ހޮވުމަށް ކައުންސިލުން ނިންމި ނިންމުންތައް ބާޠިލުކަމަށް ލޯކަލް ގަވަރމަންޓް އޮތޯރިޓީން އަންގާފައިވާ އެންގުމަކީ ޞައްޙަ އެންގުމެއްތޯ؛ އަދި ލޯކަލް ކައުންސިލްތައް އޮތޯރިޓީގެ އެންގުންތަކަށް ތަބާވުން ލާޒިމްތޯ.

ދަށުކޯޓުގެ ޙުކުމް ބާޠިލު

ޔުނިޓަރީ ދައުލަތެއްގައި ކައުންސިލްތަކަކީ ވެރިކަން ހިންގުމުގެ ބާރުގައި ހިމެނޭ އިދާރާތަކެކެވެ. އެއީ މަރުކަޒީ ސަރުކާރުގެ އިޝްރާފާއި ރަޤާބާގެ ދަށުގައިވާ އިދާރާތަކެކެވެ. އަދި ލާމަރުކަޒީ ޤާނޫނުގެ ދަށުން ލޯކަލް ގަވަރމަންޓް އޮތޯރިޓީގެ އެންގުންތަކަށް ތަބާވުން ކައުންސިލްތަކަށް ލާޒިމްވެއެވެ. މި ސަބަބުތަކުން، ވޯޓާއި އިންތިޚާބު ބާޠިލުކަމަށް އޮތޯރިޓީން އެންގި އެންގުމަކީ ޞައްޙަ އެންގުމެކެވެ.