ބޭންކް އޮފް މޯލްޑިވްސް ވ. އަޙްމަދު ފިރާޤު

ރަހުނެއް ނުހިމެނޭ ސާބިތު ދަރަނީގެ ޤަވާއިދުގެ ދަށުން ޙުކުމަށް ޢަމަލުނުކުރުމުގެ ކުށަށް 1 މަސްދުވަހަށް ގޭގައި ބަންދުކުރުމަށާއި ކުރީގެ ޙުކުމަށް ޢަމަލުކުރުމަށް މެޖިސްޓްރޭޓް ކޯޓުން ޙުކުމްކުރިއެވެ.

84/S5C/2017 ގައި ލޯނުގެ ދަރަނި ސާބިތުވެ، ޤިސްތުން ދެއްކުމަށް އަންގައި ރަހުނު ވިއްކުމުގެ ހުއްދަ ނުދީ ނިމުނެވެ. ލޯނަކީ ގޯއްޗާއި ޢިމާރާތްތަކާއި ލީސްހޯލްޑް ރައިޓްސް ރަހުނުކޮށް ދޫކުރި ލޯނެކެވެ. ދަރަނިވެރިޔާ ޙުކުމާ އެއްގޮތަށް ފައިސާ ނުދެއްކުމުން ބޭންކުން ޙުކުމް ތަންފީޛުކޮށް ރަހުނު ވިއްކުމުގެ ހުއްދައަށް އެދުނެވެ.

ބޭންކުން ބުނީ މިއީ ރަހުނު ހިމެނޭ ލޯނެއް ކަމަށްވާއިރު ރަހުނާބެހޭ ޤާނޫނާއި ޝަރީޢަތްކުރުމުގެ ޤަވާއިދާއި ރަހުނު އެގްރީމެންޓުގެ ދަށުން ބޭންކަށް ލިބޭ ޙައްޤުތަކަށް އުނިކަން އަންނަ ގޮތަށް ރަހުނެއް ނުހިމެނޭ ދަރަނީގެ ޤަވާއިދުގެ ދަށުން ނިންމި ކަމަށެވެ.

ރަހުނު ހިމެނޭ ލޯނެއްގެ ސާބިތު ދަރަނީގެ ޙުކުމެއް ތަންފީޛުކުރުމަށް ހުށަހަޅާ މައްސަލައެއްގައި، ރަހުނެއް ނުހިމެނޭ ސާބިތު ދަރަނީގެ ޤަވާއިދުގެ ދަށުން ގޭގައި ބަންދުކުރުމަށް ޙުކުމްކުރުމަކީ ޞައްޙަ ނިންމުމެއްތޯ، އަދި ރަހުނުކުރި މުދާ ވިއްކުމުގެ ހުއްދަ ދޭންޖެހޭތޯ.

ދަށުކޯޓުގެ ޙުކުމް ބާޠިލު؛ ރަހުނުކުރި މުދާ ވިއްކުމުގެ ހުއްދަ ބޭންކަށް ދީފި

ދަރަނިވެރިޔާ ޙުކުމަށް ޢަމަލުނުކުރާކަން އޭނާގެ ބަހުންވެސް ސާބިތުވެއެވެ. ލޯނަކީ ރަހުނު ހިމެނޭ ލޯނެއް ކަމުން ތަންފީޛުކުރަންވާނީ ރަހުނާބެހޭ ޤާނޫނާއި ޝަރީޢަތްކުރުމުގެ ޤަވާއިދުގެ ދަށުން ކަމަށާއި، ރަހުނެއް ނުހިމެނޭ ދަރަނީގެ ޤަވާއިދުގެ ދަށުން ނިންމުމަކީ ރަނގަޅެއް ނޫން ކަމަށް ކަނޑައެޅިއެވެ.