އަޙްމަދު ޝާނިޒު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ފޯނާއި އެ ތަކެތީގެ ޕިން ނަންބަރު، ލޮކްކޯޑު، ފިންގަރޕްރިންޓް، ފޭސް ރިކޮގްނިޝަން ފުލުހުންނަށް ދީ ހުޅުވައިދިނުމަށް އަމުރުކުރިއެވެ.

ގޭގެ ފާޚާނާގައި ފެންވަރަމުން ދިޔަ ފަރާތެއްގެ އޮރިޔާން ފޮޓޯއާއި ވީޑިއޯ ނެގިކަމުގެ ތުހުމަތުގައި، ތުހުމަތުކުރެވޭ ފަރާތް ބޭނުންކުރާ ފޯނާއި ސިމްކާޑާއި މެމޮރީކާޑު ހުޅުވައި ފުލުހުންނަށް ދިނުމަށް ކްރިމިނަލް ކޯޓުން އަމުރުކުރިއެވެ.

އިސްތިއުނާފުކުރި ފަރާތް ބުނީ ފުލުހުން ތަޙްޤީޤުގައި އިހުމާލުވިކަމަށާއި، ވިކްޓިމްގެ ބަޔާނަށް ފުރިހަމައަށް ރިޢާޔަތްނުކުރިކަމަށާއި، ހިފެހެއްޓި ފޯނަކީ ހާދިސާއަށްފަހު ލިބުނު، އެހެން ފަރާތެއްގެ ފޯނެއް ކަމަށެވެ.

ތުހުމަތުކުރެވޭ ފަރާތުގެ މޯބައިލް ފޯނާއި ސިމްކާޑާއި މެމޮރީކާޑު ހުޅުވައި ފުލުހުންނަށް ދިނުމަށް ކްރިމިނަލް ކޯޓުން ނެރުނު އަމުރާ ދެކޮޅަށް ހުށަހެޅި ނުކުތާތަކަކީ ކޯޓުތަކުގެ ޤާނޫނުގެ 43 ވަނަ މާއްދާގައިވާ އިސްތިއުނާފުކުރެވޭ ޙާލަތްތަކުގެ މައްޗަށް ބިނާވާ ނުކުތާތަކެއްތޯ.

އިސްތިއުނާފު ބާޠިލް، ކްރިމިނަލް ކޯޓުގެ އަމުރު ޤާއިމް

ނުކުތާތައް ބިނާކޮށްފައިވަނީ ތަޙްޤީޤުގެ އުނިކަންތައްތަކުގެ މައްޗަށްކަމާއި، އަމުރު ޚިލާފުވީ ކޮންގޮތަކަށްކަން ސާފުކޮށްދީފައި ނުވާކަމާއި، ފުލުހުންނަށް ދިނީ އެވަގުތު ބޭނުންކުރަމުންދިޔަ ފޯނުކަން އިސްތިއުނާފުކުރި ފަރާތުން ބުނެފައިވާތީ، ނުކުތާތަކަކީ ޤާނޫނު ނަންބަރު 22/2010 (ދިވެހިރާއްޖޭގެ ކޯޓުތަކުގެ ޤާނޫނު) ގެ 43 ވަނަ މާއްދާގައިވާ ޙާލަތްތަކުގެ މައްޗަށް ބިނާވާ ނުކުތާތަކެއް ނޫނެވެ.