އަޙްމަދު ނަސީމް ވ. ވެންކުއިޝަރ ކޮންސްޓްރަކްޝަން ކޮމްޕެނީ ޕވޓ ލޓޑ

ސިވިލް ކޯޓުން، ދަޢުވާކުރި މަސައްކަތްތަކަކީ އެއްބަސްވުމުގެ ދަށުން ކޮންޓްރެކްޓަރު ފުރިހަމަކުރަންޖެހޭ މަސައްކަތްކަން ސާބިތުނުވާކަމަށް ކަނޑައަޅައި، ދަޢުވާ ލިބުނު ފަރާތުގެ ޣައިރު ޙާޟިރުގައި ދަޢުވާ ރައްދުކުރިއެވެ.

10 ބުރީގެ ޢިމާރާތެއްގެ ފައުންޑޭޝަނާއި ގްރައުންޑް އެންޑް ފަސްޓް ފްލޯގެ ކޮންކްރީޓް، ރާނާ ސިމެންތި ޖެހުމުގެ މަސައްކަތަށް AGR/2015/004-VCC އެއްބަސްވުން ވެވުނެވެ. ކޮންޓްރެކްޓަރު މަސައްކަތް ފުރިހަމަނުކުރާތީ އެހެން ފަރާތަކާ ޙަވާލުކުރަން ޖެހުނުކަމަށް ބުނެ، ލަސްވުމުގެ ބަދަލާއި އިތުރު ޚަރަދުގެ ގޮތުގައި ޖުމްލަ 307,209ރ. ހޯދުމަށް ވެރިފަރާތުން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ކަރަންޓާއި ފެނުގެ ނިޒާމު ޤާއިމުކުރުމަކީ އެއްބަސްވުމާ އެޓޭޗްކުރެވިފައިވާ ޓެކްނިކަލް ސްޕެސިފިކޭޝަނުން ސާފުކޮށް ފެންނަ މަސައްކަތެއް ކަމަށާއި، ޙުކުމް ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފު ކަމަށެވެ.

ޢިމާރާތުގެ ފައުންޑޭޝަނާއި ކޮންކްރީޓް، ރާނާ ސިމެންތި ޖެހުމުގެ މަސައްކަތުގެ އެއްބަސްވުމުގެ ދަށުން، ކަރަންޓާއި ފެނުގެ ވައިރިންގ މަސައްކަތް ކޮންޓްރެކްޓަރު ފުރިހަމަކުރަން ޖެހޭތޯ (އެއްބަސްވުމާ އެޓޭޗްކުރެވިފައިވާ ޓެކްނިކަލް ސްޕެސިފިކޭޝަނުގެ ސަބަބުން)، އަދި ސިވިލް ކޯޓުގެ ނިންމުން ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އެއްބަސްވުމުގެ ފެށުމާއި ކޮންޓްރެކްޓާބެހޭ ޤާނޫނުގެ 2 ވަނަ މާއްދާގައި، އަންދާސީ ހިސާބާއި ޕޭމަންޓް ޝެޑިއުލާއި ކުރެހުންތަކުގައި ވައިރިންގ މަސައްކަތެއް ނުހިމެނޭކަމާއި، ސްޕެސިފިކޭޝަނަކީ މިންގަނޑުތައް ބަޔާންކުރާ ލިޔުމެއްކަމާއި، 1.22.1 ގައި ބުނަނީ ދާއިމީ ކަނެކްޝަންތައް ހޯދުމުގެ ވާހަކަ ކަމާއި، ތަޢާރުޟުވާނަމަ އެއްބަސްވުމަށް އިސްކަންދޭތީ، ސިވިލް ކޯޓުގެ ނިންމުން ޞައްޙަކަމަށް ހައިކޯޓުން ކަނޑައެޅިއެވެ.