އަޙްމަދު ފާރިސް މައުމޫން ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން 27 ޖަނަވަރީ 2018 ގައި ފޯނު ހިފެހެއްޓުމާއި މަޢުލޫމާތު ދިނުމުގެ އަމުރު ނެރުނެވެ.

ރައްޔިތުންގެ މަޖިލީހުގެ މެންބަރުންނަށް ފައިސާ ބެހިކަމަށާއި ޤާނޫނީ ވެރިކަން ވައްޓާލަން ރާވާފައިވާކަމަށް ތުހުމަތުކުރެވޭ މައްސަލައެއްގައި، އިސްތިއުނާފުކުރި ފަރާތުގެ ފޯނުތަކާއި ސިމްކާޑާއި މެމޮރީކާޑު 90 ދުވަހަށް ފުލުހުންގެ ބެލުމުގެ ދަށަށް ގެނައުމަށާއި ފޯނުގެ ޕިން، ލޮކް ކޯޑު، ޕެޓާން، ފިންގަރޕްރިންޓް ދިނުމަށް ކްރިމިނަލް ކޯޓުން އަމުރުކުރިއެވެ. 2017 ވަނަ އަހަރުވެސް އޭނާގެ ފޯނު ހިފަހައްޓައި ތަޙުލީލުކުރެވިފައިވެއެވެ.

އިސްތިއުނާފުކުރި ފަރާތުން ބުނީ ހެއްކެއް ނެތި ދޮގު މަޢުލޫމާތުގެ މައްޗަށް، ހެކި ވަޒަންނުކޮށް އަމުރު ނެރުނު ކަމަށާއި، ޤާނޫނުއަސާސީގެ 143 (ރ)، 2017/HC-A/301، ޖިނާއީ އިޖުރާއަތުގެ ޤާނޫނުގެ 48 ވަނަ މާއްދާއާއި ޤާނޫނުއަސާސީގެ އެކި މާއްދާތަކާ ޚިލާފު ކަމަށެވެ. ދައުލަތުން ބުނީ ސިއްރު ހެއްކެއްގެ ބަޔާން އޮތް ކަމަށާއި، ދޫވެފައިވާ މުއްދަތުގައި މުޢާމަލާތްކުރުމުގެ އިޙްތިމާލު އޮތް ކަމަށާއި، ޖިނާއީ އިޖުރާއަތުގެ ޤާނޫނުގެ 48 ވަނަ މާއްދާއާ ގުޅޭ ގޮތް 2017/HC-A/334 އިން ކަނޑައަޅާފައިވާ ކަމަށެވެ.

ތުހުމަތުކުރެވޭ ފަރާތެއްގެ މޯބައިލް ފޯނުތަކާއި ސިމްކާޑާއި މެމޮރީކާޑު 90 ދުވަހަށް ފުލުހުންގެ ބެލުމުގެ ދަށަށް ގެނައުމަށާއި ފޯނުގެ ޕިން/ލޮކް ކޯޑު/ފިންގަރޕްރިންޓް ދިނުމަށް ކްރިމިނަލް ކޯޓުން ނެރުނު އަމުރަކީ، ހުށަހެޅުނު ހެކި ޤަރީނާއަށް ރިޢާޔަތްކޮށް ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) ގެ (1) އާ އެއްގޮތަށް ނެރެފައިވާ އަމުރެއްތޯ.

ކްރިމިނަލް ކޯޓުގެ އަމުރު ޤާނޫނާ އެއްގޮތްނޫން (އިސްތިއުނާފު ބަލައިގަނެވުނު)

ކްރިމިނަލް ކޯޓުން ފޮނުވި ލިޔުންތަކާއި ދައުލަތުގެ ޖަވާބާއެކު ސިއްރު ހެއްކެއްގެ ބަޔާނެއް ނުވަތަ އެހެން ހެއްކެއް ފެންނަން ނެތުމާއި، ކުރިން ފޯނު ތަޙުލީލުކުރެވިފައިވާއިރު ދެވަނަ ފަހަރަށް ހިފަހައްޓަން ޖެހޭ ސަބަބެއް ދައްކާ ހެއްކެއް ނެތުމުން، އަމުރަކީ ފަނޑިޔާރުންގެ ޤާނޫނުގެ 5 (ށ)(1) އާ ޚިލާފަށް ނެރެފައިވާ އަމުރެކެވެ. ހެކީގެ ނުކުތާއިން މައްސަލަ ނިމޭތީ އެހެން ނުކުތާތަކާ ގޮތެއް ނުކަނޑައެޅުނެވެ.