ޢަބްދުއްރައްޒާޤު އަބޫބަކުރު ވ. މޯލްޑިވްސް ކަސްޓަމްސް ސަރވިސް

ސިވިލް ކޯޓުން އެދިފައިވާ ފައިސާ ލިބިދިނުމަށް އަންގާނެ ތަނެއް ނެތްކަމަށް ޙުކުމްކުރިއެވެ.

މޯލްޑިވްސް ކަސްޓަމްސް ސަރވިސްގައި ޑެޕިއުޓީ ޕްރިންސިޕަލް ކަލެކްޓަރ އޮފް ކަސްޓަމްސްގެ ސިޔާސީ މަޤާމުގައި ހުރި ފަރާތެއް ރައީސުލްޖުމްހޫރިއްޔާގެ ބާރުގެ ދަށުން ވަޒީފާއިން ވަކިކުރުމުން، ރިޓަޔަރމަންޓް ޕޭއާއި މަހުން މަހަށް ލިބޭ ފައިސާއާއި ވަކީލުގެ ފީ ހޯދުމަށް ދަޢުވާކުރިއެވެ. އޭނާ ކަސްޓަމްސްއަށް ޚިދުމަތްކޮށްފައިވަނީ ޖުމްލަ 4 އަހަރާއި 8 މަހާއި 17 ދުވަހެވެ.

އިސްތިއުނާފުކުރި ފަރާތުން ބުނީ ސިވިލް ކޯޓުގެ ނިންމުމަކީ ކަސްޓަމްސް ޤަވާޢިދުގެ 157(ރ) އަދި 161(ށ) އާ ޚިލާފު ނިންމުމެއްކަމަށެވެ.

ރައީސުލްޖުމްހޫރިއްޔާގެ ބާރުގެ ދަށުން ސިޔާސީ މަޤާމަކުން ވަކިކުރެވުނު ކަސްޓަމްސްގެ މުވައްޒަފަކަށް ކަސްޓަމްސްގެ މުވައްޒަފުންގެ ޤަވާޢިދުގެ 157 ވަނަ މާއްދާގެ (ރ) އަދި 161 ވަނަ މާއްދާގެ (ށ) ގެ ދަށުން ރިޓަޔަރމަންޓް ޢިނާޔަތް ލިބެންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އޭނާ ވަކިވެފައިވަނީ ރިޓަޔަރވެގެން ނޫންކަމާއި، 161(ށ) ގައިވާ ކޮމިޝަނަރ ޖެނެރަލް ނުވަތަ ޑެޕިއުޓީ ކޮމިޝަނަރގެ މަޤާމުގައި ހުރި ފަރާތެއް ނޫންކަމާއި، ޤަވާޢިދު ނަންބަރު 2012/R-35 (މޯލްޑިވްސް ކަސްޓަމްސް ސަރވިސްގެ މުވައްޒަފުންގެ ޤަވާޢިދު) ގެ 150 ވަނަ މާއްދާގެ ޙާލަތަކަށް ނުފެތޭތީއާއި 20 އަހަރު ޚިދުމަތް ނުކުރާތީ ރިޓަޔަރމަންޓް ފައިސާ ލިބެންޖެހޭ ފަރާތެއް ނޫންކަމެވެ.