ޢަލީ ނަޞީރު އާދަމް ވ. ސިވިލް ސަރވިސް ކޮމިޝަން (ދައުލަތް)

ސިވިލް ކޯޓުން ނިންމީ ވަޒީފާއިން ވަކިވީ މުވައްޒަފުގެ ރުހުމުގައިކަމަށާއި، ރުހުން ލިޔުމުން ފެންނަން ނުޖެހޭކަމަށާއި، ނޯޓިސްގެ ބަދަލާއި އެއްފަހަރާ ދެވޭ ޢިނާޔަތް ދިނުމަށް އަންގާނެ ތަނެއް ނެތްކަމަށެވެ.

ޢަލީ ނަޞީރު އާދަމް ބޮޑުކަތީބުކަމުގެ ސިވިލް ސަރވިސް ވަޒީފާގައި ހުއްޓައި، ޤާނޫނުއަސާސީގެ 115 (ޅ) ގެ ދަށުން ޕްރޮވިންސް އޮފީހުގެ ކައުންސިލަރުކަމުގެ މަޤާމަށް ޢައްޔަންކުރެވުމުން، ސިވިލް ސަރވިސް ކޮމިޝަނުން 55 އަހަރުވުމުން މުވައްޒަފު އެދިގެންކަމަށް ބުނެ މުސްކުޅިކޮށް ވަޒީފާއިން ވަކިކުރިއެވެ. ނޯޓިސްގެ ބަދަލާއި އެއްފަހަރާ ދެވޭ ޢިނާޔަތް ހޯދުމަށް ސިވިލް ކޯޓުގައި ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ވަކިކުރީ އޭނާގެ އެދުމަކާނުލައި ކޮމިޝަނުގެ އިޚްތިޔާރުގެ ދަށުންކަމަށާއި، ސިޔާސީ މަޤާމުގެ ވާޖިބުތައް އަދާކުރުމަކީ މުސްކުޅިކުރުމަށް އެދުނުކަމުގެ ޙުއްޖަތަކަށް ނުވާނެކަމަށެވެ. ކޮމިޝަނުން ބުނީ ވަކިކުރީ ސިޔާސީ މަޤާމުގެ މަސްއޫލިއްޔަތު އަދާކުރަން ފެށުމުންކަމަށެވެ.

ސިވިލް ސަރވިސްގެ މުވައްޒަފަކު ޤާނޫނުއަސާސީގެ 115 (ޅ) ގެ ދަށުން ސިޔާސީ މަޤާމަކަށް ޢައްޔަންކުރުމާ ގުޅިގެން ސިވިލް ސަރވިސްގެ ވަޒީފާއިން 55 އަހަރުގައި މުސްކުޅިކޮށް ވަކިކުރީ އޭނާގެ އެދުމުގައިތޯ، ނުވަތަ ކޮމިޝަނުގެ އިޚްތިޔާރުގެ ދަށުންތޯ، އަދި އެހެންވެއްޖެނަމަ އެއްފަހަރާ ދެވޭ ޢިނާޔަތް ލިބެންޖެހޭތޯ.

ދަށުކޯޓުގެ ޙުކުމް ބާޠިލު؛ އެއްފަހަރާ ދެވޭ ޢިނާޔަތް 30 ދުވަހުގެ ތެރޭގައި ދިނުމަށް ސިވިލް ސަރވިސް ކޮމިޝަނަށް އަންގައި ޙުކުމްކުރި

ސިޔާސީ މަޤާމަކީ ސިވިލް ސަރވިސްގައި ނުހިމެނޭ މަޤާމެއް ކަމާއި، މުވައްޒަފު ރައީސުލްޖުމްހޫރިއްޔާއަށާއި ކޮމިޝަނަށް ފޮނުވި ސިޓީތަކުން ވަކިކުރީ އޭނާ އެދިގެން ނޫންކަން އެނގޭތީ، ކޮމިޝަނުގެ އިޚްތިޔާރުގެ ދަށުން މުސްކުޅިކުރެވޭ މުވައްޒަފުންނަށް ޖަދުވަލު 15 ގައިވާ އެއްފަހަރާ ދެވޭ ޢިނާޔަތް ވެސް އޭނާއަށް ޙައްޤުވާކަމަށް ކޯޓުން ނިންމިއެވެ.