ޢަބްދުﷲ ޔާމީން ޢަބްދުލްޤައްޔޫމް ވ. ޕްރޮސިކިއުޓަރ ޖެނެރަލް

ކުރިމިނަލް ކޯޓުން ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 60 (ށ) (1) އަށް ރިޢާޔަތްކޮށް ރިމާންޑް ޖަލެއްގައި ޙުކުމް ކުރެވެންދެން ބަންދުކުރުމަށް އަމުރުކުރިއެވެ.

މަނީ ލޯންޑްރިންގގެ މައްސަލައެއް ކުރިމިނަލް ކޯޓަށް ހުށަހެޅިފައިވާއިރު، އެ މައްސަލައިގެ ހެކިންނަށާއި އެމް.އެމް.ޕީ.އާރު.ސީގެ ފައިސާއަށް ޚިޔާނާތްތެރިވި މައްސަލައިގެ ތަޙްޤީޤަށް ނުފޫޒު ފޯރުވިކަމުގެ އިންޓެލިޖެންސް މަޢުލޫމާތާ ގުޅިގެން އިސްތިއުނާފުކުރި ފަރާތް ބަންދުކުރުމަށް ޕްރޮސިކިއުޓަރ ޖެނެރަލް އެދުނެވެ.

އިސްތިއުނާފުކުރި ފަރާތުން ބުނީ ހެކިންނަށް ނުފޫޒު ފޯރުވުމެއް ނުހިނގާ ޙާލު އިންޓެލިޖެންސް ރިޕޯޓަކަށް ބިނާކޮށް ބަންދުކުރުމާއި، ކޯޓަށް ހުށަނާޅާ އެހެން މައްސަލައަކަށް ރިޢާޔަތްކޮށް އަމުރު ނެރުން ޤާނޫނުއަސާސީގެ 49 ވަނަ މާއްދާއާއި ސުޕްރީމް ކޯޓުގެ 2010/SC-A/19 ގެ އަސާސްތަކާ ޚިލާފު ކަމަށެވެ. ދައުލަތާއި ފުލުހުން ހައިކޯޓުގައި ބުނީ މަނީ ލޯންޑްރިންގގެ މައްސަލައިގެ ހެކިންނަށް ނުފޫޒު ފޯރުވިކަމުގެ ހެއްކެއް ނެތްކަމަށާއި ތަޙްޤީޤު ނިމޭނެ ދުވަހެއް ނޭނގޭ ކަމަށެވެ.

މަނީ ލޯންޑްރިންގގެ މައްސަލައިގެ އިތުރުން، ތަޙްޤީޤު ކުރަމުންދާ އެހެން މައްސަލައެއްގެ ހެކިންނަށް ނުފޫޒު ފޯރުވިކަމަށް ބުނެ އިންޓެލިޖެންސް މަޢުލޫމާތަށް ބިނާކޮށް ޙުކުމް ކުރެވެންދެން ބަންދުކުރުމަށް ކުރިމިނަލް ކޯޓުން ނެރުނު އަމުރު ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާއާ އެއްގޮތްތޯ.

ކޯޓު އަމުރުގެ ބަންދުގެ ބައި ބާޠިލު، ބަންދުން ދޫކޮށްލުމަށް އަމުރުކުރި

ތަޙްޤީޤު ކުރަމުންދާ މައްސަލައިގެ ތުހުމަތުގައި ހައްޔަރުކުރުމުގެ އިޖުރާއަތު ފުރިހަމަނުކޮށް، ކޯޓަށް ހުށަހެޅި އެހެން މައްސަލައެއްގެ ޝަރީޢަތުގެ ތެރެއިން ބަންދު ނުކުރެވޭނެކަމާއި، ތުހުމަތުކުރެވޭ މިންވަރުގެ ހެއްކެއް ނެތްކަމަށް ދައުލަތުން ބުނާއިރު 60 (ށ) (1) ގެ ދަށުން ބަންދު ނުކުރެވޭނެކަމާއި، 30 ދުވަސް ހަމަވެފައިވާތީ ބަންދުގައި ބެހެއްޓޭނެ ސަބަބެއް ނެތެވެ.