ޢަބްދުﷲ ރަޝީދު ވ. ޢަލީ ރަޝީދު

ކުރިން ކޮށްފައިވާ ޙުކުމަށް ހަމަ އެކޯޓުން ބަދަލު ގެނެވޭނެ ޝަރުޢީ ޤާނޫނީ ހަމައެއް ނެތްކަމަށް ކަނޑައަޅައި ފޮނަދޫ މެޖިސްޓްރޭޓް ކޯޓުން ދަޢުވާ ބަލައިނުގަތެވެ.

ބައްޕަގެ ތަރިކައިން ދެއަޚުންނަށް ލިބުނު ގޭގެ ބައިކުރުމުގެ ޤަޟިއްޔާއެއް (71/O8C/2009) ގައި، އިސްތިއުނާފުކުރި ފަރާތް އޭނާއަށް ލިބިފައިވާ ބިމުގައި ގެ ހަދައި ބަދަލުވެވެންދެން އެ ގޭގައި އުޅެވޭނެ ޝަރުޠެއްގެ މައްޗަށް އޭނާގެ ބައި ބޭބެއަށް ދޫކޮށްލިއެވެ. ފަހުން ގެ ނިމުމުގެ ކުރިން ގެއިން ނިކުތުމަށް ބޭބެ އެންގުމުން، ދޫކޮށްލި ބައި އަބުރާ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، ދަޢުވާ ފޯމުގައި ހެކިންގެ މަޢުލޫމާތު ހިމަނައި ހެކިން ޙާޟިރުކުރުމަށް އެދިފައިވާއިރު، ހެއްކާބެހޭ ޤާނޫނުގެ 5 އަދި 6 ވަނަ މާއްދާއާ ޚިލާފަށް ހެކިބަސް ނުނަގައި މައްސަލަ ނިންމާފައިވާ ކަމަށެވެ.

ކުރިން ނިމިފައިވާ ބައިކުރުމުގެ ޤަޟިއްޔާއެއްގައި އަޚާއަށް ދޫކޮށްލި ގޭގެ ބައި އަބުރާ ހޯދުމަށް ހުށަހެޅި ދަޢުވާގައި، ހެކިން ޙާޟިރުނުކޮށް ދަށުކޯޓުން މައްސަލަ ނިންމުމަކީ ހެއްކާބެހޭ ޤާނޫނާ ޚިލާފު ކަމެއްތޯ؛ އަދި ކަނޑައެޅި ނިޔާގެ ބާރު ލިބިފައިވާ ޙުކުމަކަށް ފަހުން ހުށަހަޅާ ޤަޟިއްޔާއެއްގެ ތެރެއިން ބަދަލު ގެނެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ގެއިން ނިކުތުމަށް ބުނިކަމަށް އިސްތިއުނާފު ރައްދުވާ ފަރާތުން އިންކާރު ނުކުރާތީ ހެކިން ޙާޟިރުކުރަން ނުޖެހެއެވެ. 71/O8C/2009 ޤަޟިއްޔާއަކީ އިސްތިއުނާފު ނުކޮށްވާ، ކަނޑައެޅި ނިޔާގެ ބާރު ލިބިފައިވާ ޙުކުމަކަށް ވާތީ، ފަހުން ހުށަހަޅާ ޤަޟިއްޔާއެއްގެ ތެރެއިން އޭގެ ޙުކުމަށް ބަދަލު ނުގެނެވެއެވެ.