ސަމީރު އަޙްމަދު ވ. މުޙައްމަދު ޔޫސުފް

ސިވިލް ކޯޓުން، ދަރަނި ދެއްކުމުގެ ޒިންމާ އަޞްލު ދަރަނިވެރިޔާގެ މައްޗަށް އެނބުރިފައިވާކަމަށް ކަނޑައަޅައި، 3 މަސްދުވަހުގެ ތެރޭގައި ބާކީ ފައިސާ ސިވިލް ކޯޓަށް ދައްކަން ޙުކުމްކުރިއެވެ.

ސިވިލް ކޯޓުގެ C/2012-1516/Cv ޤަޟިއްޔާއިން އިސްތިއުނާފުކުރި ފަރާތުގެ މައްޗަށް 1,470,000 ރުފިޔާގެ ދަރަނި ސާބިތުވިއެވެ. ފަހުން C/2015-1046/Cv ޤަޟިއްޔާގައި ތިންވަނަ ފަރާތެއް އެ ދަރަންޏަށް ފަރުދީގޮތުން ޒިންމާވުމަށް އެއްބަސްވި ނަމަވެސް 10,000 ރުފިޔާ ފިޔަވައި ދަރަނި ނުދައްކައެވެ.

އިސްތިއުނާފުކުރި ފަރާތުން ބުނީ ތިންވަނަ ފަރާތުގެ ބަސްނުއަހާ C/2015-1046/Cv ގެ ޙުކުމާ ޚިލާފަށް ދަރަނި އޭނާގެ މައްޗަށް ކަނޑައެޅިކަމަށާއި، ހަމަ އެ ފަނޑިޔާރު ކުރީގެ ނިންމުމެއް ބަދަލުކުރިކަމަށެވެ.

ސާބިތު ދަރަންޏަކަށް ތިންވަނަ ފަރާތެއް ފަރުދީގޮތުން ޒިންމާވުމަށް ދަރަނިވެރިޔާއާ ދެމެދު އެއްބަސްވެ އެކަން ކޯޓުން ކަނޑައަޅާފައިވީނަމަވެސް، ދަރަނި ލިބޭ ފަރާތުގެ ރުހުމެއް ނެތިއްޔާ، ދަރަނި ދެއްކުމުގެ ޒިންމާ އަޞްލު ދަރަނިވެރިޔާގެ މައްޗަށް އެނބުރި ދާނެތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ތިންވަނަ ފަރާތާ ދެމެދުގެ އެއްބަސްވުމަކީ ޙަވާލާއެއް ކަމުން، ދަރަނި ލިބޭ ފަރާތުގެ ރުހުން ނެތި އެ އެއްބަސްވުން ޞައްޙަ ނުވާތީއާއި ދަރަނި ޚަލާޞްވެފައި ނުވާތީ، ސިވިލް ކޯޓުގެ ޙުކުމަށް ބަދަލު ގެންނަންޖެހޭ ސަބަބެއް ނެތެވެ.