ޕްރޮސިކިއުޓަރ ޖެނެރަލް ވ. ނަސީމާ ޢަބްދުﷲ

އެ ހެކި އެންޓި-ކޮރަޕްޝަން ކޮމިޝަނުން ހޯދާފައިވަނީ ކޮމިޝަނުގެ ތަޙްޤީޤުކުރުމުގެ އުސޫލާ ޚިލާފަށް ކަމަށާއި އެއީ ޤާނޫނުއަސާސީގެ 52 ވަނަ މާއްދާގެ ދަށުން ޤަބޫލުނުކުރެވޭ ހެކި ކަމަށް ބުނެ، ދަޢުވާ މައުޟޫޢީގޮތުން ބެލޭނެ ތަނެއް ނެތްކަމަށް ކަނޑައަޅައި މައްސަލަ ނިންމިއެވެ.

މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމާއި ހޯދުމުގެ ކުށުގެ ދަޢުވާ ތިން ފަރާތެއްގެ މައްޗަށް ޕްރޮސިކިއުޓަރ ޖެނެރަލް ވިލިނގިލީ މެޖިސްޓްރޭޓް ކޯޓަށް ހުށަހެޅިއެވެ. ދަޢުވާ ބިނާވެފައިވަނީ ގއ. އަތޮޅު ތަޢުލީމީ މަރުކަޒުގެ ވައުޗަރާއި ވަޒީފާގެ ބަޔާންތަކުގެ މައްޗަށެވެ.

ދައުލަތުން ބުނީ ކޮމިޝަނުގެ އުސޫލަކީ ޤާނޫނެއްގެ ދަށުން ހަދާ ޝާއިޢުކުރާ އުސޫލެއް ނޫންކަމަށާއި، ހެކި ހޯދާފައިވަނީ ބަލާފާސްކުރުމުގެ އަމުރެއްގެ ދަށުން، ތައްގަނޑު ޖަހައިގެން ކަމަށެވެ. އިސްތިއުނާފު ރައްދުވާ ފަރާތްތަކުން ބުނީ ބަލާފާސްކުރުމުގެ އަމުރު ކޯޓަށް ހުށަހަޅާފައި ނުވާކަމަށާއި ލިޔުންތަކުގައި އަސްލާ އެއްގޮތްކަމުގެ ތައްގަނޑު ނެތްކަމަށެވެ.

އެންޓި-ކޮރަޕްޝަން ކޮމިޝަނުގެ ތަޙްޤީޤް ކުރުމުގެ އުސޫލާ ޚިލާފަށް ހޯދި ކަމަށް ބުނާ ހެކިތަކަކީ ޤާނޫނުއަސާސީގެ 52 ވަނަ މާއްދާގެ ދަށުން ޤާނޫނާ ޚިލާފަށް ހޯދި ހެކި ކަމުގައި ބަލައި، އެ ހެކީގެ މައްޗަށް ބިނާކޮށް އުފުލި ދަޢުވާ މައުޟޫޢީގޮތުން ނުބެލޭނެ ކަމަށް މެޖިސްޓްރޭޓް ކޯޓުން ކަނޑައެޅުން ޞައްޙަތޯ؛ އަދި ޖިނާއީ އިޖުރާއަތުގެ ޤާނޫނުގެ 83 (ހ) އާއި ގަވާއިދުގެ 122 ވަނަ މާއްދާއާ ޚިލާފުވެފައިވޭތޯ.

ދަށުކޯޓުގެ ނިންމުން ބާޠިލު؛ އަލުން ބެލުމަށް ފޮނުވި

ކޮމިޝަނުގެ އުސޫލަކީ ޤާނޫނަކުން ބާރުލިބިގެން ހަދާ ޝާއިޢުކުރާ އުސޫލެއް ނޫންކަމުން އެއާ ޚިލާފުވުމުން ހެކި ޤާނޫނާ ޚިލާފަށް ހޯދި ހެކި ކަމުގައި ނުބެލެވޭނެ ކަމަށާއި، އެ އުސޫލަށް ބަލާއިރުވެސް އަމުރު އޮތްކަމާއި ލިޔުންތަކުގައި އިދާރާގެ ތައްގަނޑު ޖަހާފައިވާކަން އެނގޭތީ، ދަށުކޯޓުގެ ނިންމުން ބާޠިލްކޮށް އަލުން ބެލުމަށް ފޮނުވިއެވެ.