ޕްރޮސިކިއުޓަރ ޖެނެރަލް ވ. އަޙްމަދު މަޢުސޫމް

ކްރިމިނަލް ކޯޓުން ދަޢުވާ ސާބިތުވާކަމަށް ކަނޑައަޅައި 3 އަހަރު ދުވަހުގެ ޖަލު ޙުކުމެއް ކުރިއެވެ. އެ ޙުކުމް ދެފަރާތުންވެސް އޭރުގެ އިސްތިއުނާފީ މުއްދަތުގައި އިސްތިއުނާފު ނުކުރެވެއެވެ.

ޕާކިންޒޯނެއްގައި ހުރި ބައިސްކަލެއްގެ ދެ ތަޅު ހަލާކުކޮށްލިކަމަށް ބިރުދެއްކުމާއި ނުރައްކާތެރި ހަތިޔާރު މަނާކުރުމުގެ ޤާނޫނުގެ ދަށުން މީހެއްގެ މުދަލަށް ގެއްލުން ދިނުމުގެ ދަޢުވާ ކުރެވުނެވެ.

ޕްރޮސިކިއުޓަރ ޖެނެރަލް ބުނީ އޭރުގެ އުޞޫލަކީ ޤާނޫނުލްޢުޤޫބާތުގެ 88 (ށ) ގެ ދަށުން ދަޢުވާކުރުން ކަމަށާއި އެގޮތަށް ކުރިނަމަ އަދަބު ކުޑަވާނެ ކަމަށެވެ. އިސްތިއުނާފު ފޯމުގައި 88 (ށ) ގެ ދަށުން އަދަބު ކަނޑައެޅުމަށް އެދުނު ނަމަވެސް، ޝަރީޢަތުގައި އެދުނީ ޙުކުމް ބާޠިލުކުރުމަށެވެ. ދަޢުވާލިބުނު ފަރާތުން ބުނީ ކުށާ ނުބައްދަލު ބޮޑު އަދަބެއް ލިބިފައިވާ ކަމަށެވެ.

ދަށުކޯޓުން ކުށް ސާބިތުވެ އަދަބު ކަނޑައަޅައި ނިމި، އިސްތިއުނާފީ މުއްދަތު ހަމަވުމަށްފަހު، ދަޢުވާކުރީ އޭރު ޢަމަލުކުރަމުންދިޔަ އުޞޫލާ ޚިލާފަށް ކަމަށާއި އަދަބު ބޮޑުވެފައިވާ ކަމަށް ބުނެ ޕްރޮސިކިއުޓަރ ޖެނެރަލް އިސްތިއުނާފުކޮށް، ހައިކޯޓުން ޙުކުމް ބާޠިލުކޮށް ނުވަތަ ދަށުކޯޓުގައި ނުކުރާ ދަޢުވާއެއްގެ ދަށުން އަދަބު ކަނޑައެޅިދާނެތޯ.

އިސްތިއުނާފު ބާޠިލު، ދަށުކޯޓުގެ ޙުކުމް ޤާއިމް

އޭރު ޢަމަލުކުރި އުޞޫލެއް ހުށަހަޅާފައި ނުވާތީއާއި، ހިންގެން ނެތް ޤާނޫނެއްގެ ދަށުން ދަޢުވާކުރި ކަމަށް ނުބުނާތީއާއި، ޙުކުމް ޤާނޫނާ ޚިލާފު ކަމަށް ނުވަތަ އަދަބު ކަނޑައެޅުމުގެ އުޞޫލާ ޚިލާފު ކަމަށް ބުނެ އިސްތިއުނާފުކޮށްފައި ނުވާތީއާއި، ދަށުކޯޓުގައި ނުކުރާ ދަޢުވާއެއްގެ މައްޗަށް ހައިކޯޓުން ޙުކުމް ނުކުރެވޭތީއާއި، އިސްތިޤްރާރުވެފައިވާ ޙުކުމް ބާޠިލުކުރުން އިންސާފުވެރި ނުވާތީ ޙުކުމަށް ބަދަލެއް ނުގެނެވެއެވެ.