ޕްރޮސިކިއުޓަރ ޖެނެރަލް ވ. މަހުދީ ޢަޤީލް

ތަޙްޤީޤުގައި ބަޔާން ނަގާފައިވަނީ ޖިނާއީ އިޖުރާއަތުގެ ޤާނޫނުގެ 50 ވަނަ މާއްދާ ފުރިހަމަނުކޮށް ބާޠިލު އިޖުރާއަތެއްގެ މައްޗަށް ކަމަށްވާތީ، ޖިނާއީ އިޖުރާއަތުގެ ޤާނޫނުގެ 120 ވަނަ މާއްދާގެ (ނ) ގެ ދަށުން ދަޢުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމިއެވެ.

ކައިވެނިކޮށްގެން އުޅުނު އަނބިމީހާއަށް އަނިޔާކުރި ކަމަށް ތުހުމަތުކޮށް ދައުލަތުން އަނިޔާއެއް ދިނުމުގެ ކުށުގެ ދަޢުވާ ކުރިއެވެ. ތުހުމަތުކުރެވޭ ފަރާތުން ޝަރީޢަތުގެ ކުރިން ހުށަހަޅާ ހުށަހެޅުމެއްގެ ގޮތުގައި ބަޔާން ނަގާފައިވަނީ އިޖުރާއަތާ ޚިލާފަށް ކަމަށް ހުށަހެޅިއެވެ.

ތުހުމަތުކުރެވޭ ފަރާތާ ސުވާލުކުރީ ފުލުހުންގެ ބެލުމުގެ ދަށަށް ގެނެސްގެން ނޫން ކަމަށާއި، ބަޔާން ބާޠިލެއް ނޫން ކަމަށް ޕްރޮސިކިއުޓަރ ޖެނެރަލް ބުނެފައިވެއެވެ. ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 50 ވަނަ މާއްދާގެ (ށ) އާއި (ކ) ގައިވާ އިންޒާރާއި ފުރުޞަތުތައް ނުދީ ބަޔާން ނެގި ކަމަށް ތުހުމަތުކުރެވޭ ފަރާތް ބުނެފައިވެއެވެ.

ތަޙްޤީޤުގައި ތުހުމަތުކުރެވޭ ފަރާތުގެ ބަޔާން ނަގާފައިވަނީ ޖިނާއީ އިޖުރާއަތުގެ ޤާނޫނުގެ 50 ވަނަ މާއްދާގައިވާ އިޖުރާއަތްތައް ފުރިހަމަ ނުކޮށް ކަމަށްބުނެ، ތަޙްޤީޤު ބާޠިލު ކަމުގައި ބަލައި އަނިޔާއެއް ދިނުމުގެ ކުށުގެ ދަޢުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމުމަކީ ޤާނޫނާ އެއްގޮތަށް ނިންމި ނިންމުމެއްތޯ.

ދަށުކޯޓުގެ ނިންމުން ބާޠިލު، މައްސަލަ މައުޟޫޢީ ގޮތުން ބެލުމަށް ކްރިމިނަލް ކޯޓަށް އަލުން ފޮނުވި

ތުހުމަތުކުރެވޭ ފަރާތް އަމިއްލަ އިޚްތިޔާރުގައި ފުލުހުންގެ އޮފީހަށް ޙާޟިރުވެ، ޤާނޫނީ އިންޒާރު ދީ، ވަކީލުގެ ޙައްޤު ދޫކޮށްލާފައިވާއިރު، ބަޔާނަކީ ހެއްކެއްގެ ގޮތުގައި ހުށަހަޅާފައިވާ އެއްޗެއްވެސް ނޫނެވެ. އަސާސީ ޙައްޤަކުން މަޙްރޫމްކުރި ކަމެއް ނުފެންނާތީ ދަޢުވާ ކުރިއަށް ނުގެންދެވޭނެ ކަމަށް ބެލުމުގެ ހަމައެއް ނެތެވެ.