ޕްރޮސިކިއުޓަރ ޖެނެރަލް ވ. ލޫޠު އަހްމަދު ޢާޞިފް

ބަންދު މުރާޖަޢާކުރަން ދައުވާލިބޭ ފަރާތުން އެދުމުން، ކްރިމިނަލް ކޯޓުން ހުޅުވާލެވިފައިވާ މަޖިލީހެއް ނުބާއްވާ، ހެކިބަސް ނެގުމުގެ މަރުޙަލާގައި ހުރުމާއި، ގިނަ ދުވަސް ބަންދުގައި ހުރުމާއި، ލަޓިބުރިއެއް ކަމަށް ދަޢުވާގައި ވުމާއި، ހެކިން ސިއްރުކުރެވިފައިވުމާއި، ޝަރުޠުތަކުން ސުލޫކު ބައްޓަންކުރެވޭނެ ކަމަށް ބުނެ ބަންދުން ދޫކޮށްލިއެވެ.

ޖަމާޢަތް ހަދައިގެން ތޫނު ހަތިޔާރު ބޭނުންކޮށް ހިންގި މާރާމާރީއެއްގެ ތުހުމަތުގައި ހައްޔަރުކޮށް، 17/2010 ގެ 8 ވަނަ މާއްދާގެ ދަށުން ދަޢުވާ އުފުލި ތުހުމަތުކުރެވޭ ފަރާތް، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 16 ވަނަ މާއްދާގެ ދަށުން މައްސަލަ ނިމެންދެން ބަންދުކުރުމަށް 12 މޭ 2022 ގައި އަމުރުކުރެވުނެވެ.

ދައުލަތުން ބުނީ ޤާނޫނު ނަންބަރު 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 16 ވަނަ މާއްދާގެ ޙާލަތު ދެމިއޮއްވާ ޙާލަތު ބަދަލުނުވެ ދޫކޮށްލީ ކަމަށާއި، ހުޅުވާލެވިފައިވާ މަޖިލީހެއް ނުބާއްވާ ނިންމީ ގަވާއިދުގެ 11 ވަނަ މާއްދާއާ ޚިލާފަށް ކަމަށެވެ. ދައުވާލިބޭ ފަރާތުން ބުނީ ދެ އަހަރު ބަންދުގައި ހުރުމުން ކިޔެވުމުގެ ފުރުޞަތު ގެއްލިފައިވާ ކަމަށާއި ހެކިން ސިއްރުކުރެވިފައިވާތީ ނުފޫޒު ނުފޯރުވޭނެ ކަމަށެވެ.

ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 16 ވަނަ މާއްދާގެ ދަށުން ޝަރީޢަތް ނިމެންދެން ބަންދުކޮށްފައިވާ މީހަކު، ޙާލަތު ބަދަލުވިގޮތް ބަޔާންނުކޮށް އަދި ހުޅުވާލެވިފައިވާ ޝަރީޢަތުގެ މަޖިލީހެއް ނުބާއްވާ ބަންދުން ދޫކޮށްލުން ޤާނޫނާ އެއްގޮތްތޯ.

ދަށުކޯޓުގެ އަމުރު ބާޠިލު؛ 7 ދުވަހުގެ ތެރޭ ހުށަހަޅައިފިނަމަ ބަންދާމެދު ގޮތެއް ނިންމުމަށް ކްރިމިނަލް ކޯޓަށް އެންގި

ތުހުމަތު ނެތިދިޔަކަމެއް ނުވަތަ ޤާނޫނުއަސާސީގެ 49 ވަނަ މާއްދާގެ ޙާލަތު ނަފީވިކަމެއް އަމުރުގައި ބަޔާންކޮށްފައި ނެތުމާއި، ދޫކުރި ސަބަބުތަކަކީ ޤާނޫނު ނަންބަރު 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 16 ވަނަ މާއްދާގެ ދަށުން ބަންދުން ވީއްލޭނެ ހަމަތަކެއް ނޫން ކަމާއި، ހުޅުވާލެވިފައިވާ މަޖިލީހެއް ނުބާއްވާ ނިންމުން ގަވާއިދުގެ 11 ވަނަ މާއްދާއާ ޚިލާފުވުމުން އަމުރު ބާޠިލުކުރިއެވެ.