ޕްރޮސިކިއުޓަރ ޖެނެރަލް ވ. ހޫދު މުޙައްމަދު ޒާހިރު

ކްރިމިނަލް ކޯޓުން ޝަރީޢަތް ނިމެންދެން ބަންދުކުރި އަމުރު އިތުރު 60 ދުވަހަށް ސަސްޕެންޑްކޮށް، ޓެގް އެޅުވުމާއި ޑިވައިސްތައް ބެލުމަށް ހުއްދަދިނުން ފަދަ ޝަރުތުތަކާއެކު ދޫކޮށްލިއެވެ.

ޓެރަރިޒަމާ ގުޅޭ ފަސް ދަޢުވާއެއްގައި 2022 ގައި ޝަރީޢަތް ނިމެންދެން ބަންދުކުރެވުނު ފަރާތެއް، ސިޓީއަކާ ގުޅިގެން 2024 އޮކްޓޫބަރުގައި 60 ދުވަހަށް ޝަރުތުތަކާއެކު ދޫކޮށްލިއެވެ. އެ މުއްދަތު އިތުރުކޮށްދިނުމަށް އެދުމުން، އިތުރު 60 ދުވަހަށް ޝަރުތުތަކާއެކު ދޫކޮށްލަން ކްރިމިނަލް ކޯޓުން އަމުރުކުރިއެވެ.

ދައުލަތުން ބުނީ ޓެރަރިޒަމް ޤާނޫނުގެ 26 (ފ) ގެ ދަށުން ބަންދުކުރެވޭ މީހަކު ޝަރުތުކޮށް ދޫކުރުމަކީ ޤާނޫނުން ހުއްދަކުރާ ކަމެއް ނޫންކަމަށާއި ޙާލަތު ބަދަލުވެފައި ނުވާކަމަށާއި ޝަރުތުތަކަކީ ޤާނޫނުގައި ނެތް ޝަރުތުތަކެއްކަމަށެވެ. ރައްދުވާ ފަރާތުން ބުނީ ކުރިން ދޫކުރި އަމުރު ނިހާއީވެފައިވާކަމަށާއި ހެކިން ބަދަލު އައިކަމަށެވެ.

ޓެރަރިޒަމް މަނާކުރުމުގެ ޤާނޫނުގެ 26 ވަނަ މާއްދާގެ (ފ) ގެ ދަށުން ޝަރީޢަތް ނިމެންދެން ބަންދުކޮށްފައިވާ މީހެއްގެ ބަންދު، ޖިނާއީ އިޖުރާއަތުގެ ޤާނޫނުގެ ދަށުން މުރާޖަޢާކޮށް ޝަރުތުތަކާއެކު ދޫކޮށްލެވިދާނެތޯ.

ކްރިމިނަލް ކޯޓުގެ އަމުރު ބާޠިލު

ޓެރަރިޒަމް ޤާނޫނުގެ ދަށުން ބަންދުކުރެވިފައިވާ މީހެއްގެ ބަންދު މުރާޖަޢާކުރުމުގެ އިޖުރާއަތު 26 (ގ) ގައި ބަޔާންކޮށްފައިވާއިރު، އެ ހުށަހެޅުން ކުރެވޭނީ ޕްރޮސިކިއުޓަރ ޖެނެރަލަށް ކަމުން، ޖިނާއީ އިޖުރާއަތުގެ ޤާނޫނުގެ ދަށުން ބަންދު މުރާޖަޢާކުރުމަކީ ރަނގަޅު އިޖުރާއަތެއް ނޫނެވެ.