ޕްރޮސިކިއުޓަރ ޖެނެރަލް ވ. ޙަސަން އާޒިމް

ކްރިމިނަލް ކޯޓުން ޝަރީޢަތް ނިމެންދެން ބަންދުގައި ބެހެއްޓުމުގެ އަމުރު ބާޠިލްކޮށް ތުހުމަތުކުރެވޭ ފަރާތް ބަންދުން ދޫކޮށްލިއެވެ.

ގުރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގިކަމުގެ ތުހުމަތުގައި ދަޢުވާ ކުރެވިފައިވާ ފަރާތެއް، ކްރިމިނަލް ކޯޓުގެ 759/Cr-C/2015 ޤަޟިއްޔާގައި ޙުކުމްކުރަންދެން ބަންދުގައި ބެހެއްޓުމަށް 145-J/MD/2015/8463 އަމުރުން 2015 ވަނަ އަހަރު އަމުރުކުރިއެވެ. ހެކިބަސް ނަގައި ނިމި ޚުލާޞާ ބަޔާން ހުށަހެޅުން އެކަނި ބާކީ ހުރިއިރު، ބަންދުގައި ގިނަ ދުވަސްވެ އަޑުއެހުންތައް މެދުކެނޑިފައި ހުއްޓައެވެ.

ޕްރޮސިކިއުޓަރ ޖެނެރަލް ބުނީ، އަމުރަކީ ޤާނޫނުއަސާސީގެ 49 ވަނަ މާއްދާ، ޖިނާއީ އިޖުރާއަތުގެ ޤާނޫނުގެ 59 ވަނަ މާއްދާ އަދި 60 ވަނަ މާއްދާގެ (ށ)، ހަތިޔާރު މަނާކުރުމުގެ ޤާނޫނުގެ 12 އަދި 16 ވަނަ މާއްދާ އަދި މަތީ ކޯޓުތަކުގެ ނިންމުންތަކަށް ތަބާވުމުގެ އުޞޫލު (ޤާނޫނުއަސާސީގެ 143 (ރ)) އާ ޚިލާފު އަމުރެއް ކަމަށެވެ.

ތޫނު ހަތިޔާރު ބޭނުންކޮށްގެން މާރާމާރީ ހިންގިކަމުގެ ތުހުމަތުގައި ޝަރީޢަތް ނިމެންދެން ބަންދުގައި ބެހެއްޓުމަށް ނެރުނު އަމުރު ބާޠިލްކޮށް ތުހުމަތުކުރެވޭ ފަރާތް ބަންދުން ދޫކޮށްލި ކްރިމިނަލް ކޯޓުގެ އަމުރަކީ ޤާނޫނުއަސާސީގެ 49 ވަނަ މާއްދާ، ޖިނާއީ އިޖުރާއަތުގެ ޤާނޫނުގެ 59 އަދި 60 ވަނަ މާއްދާ އަދި ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނާ ޚިލާފު އަމުރެއްތޯ.

ދަށުކޯޓުގެ އަމުރު ބާޠިލު؛ ބަންދަށް އެދި ހުށަހަޅައިފިނަމަ ކްރިމިނަލް ކޯޓުން އަލުން ގޮތެއް ނިންމަންޖެހޭ

ޝަރީޢަތް ނިމެންދެން ބަންދުކުރެވިފައިވާ ފަރާތެއް ދޫކޮށްލާނަމަ އޭގެ ސަބަބު އަމުރުގައި ބަޔާންކުރަންޖެހޭއިރު، އަމުރުގައި އެ ސަބަބު ސާފުކޮށް ބަޔާންކޮށްފައި ނުވާކަމާއި، ނުރައްކާތެރި ކުށެއްގެ ތުހުމަތުކުރެވޭ ފަރާތެއް ފިލައިގެން ނުދާނެކަމާއި ކޯޓަށް ހާޒިރުވާނެކަން ކަށަވަރުކުރުމަށް އެއްވެސް ފިޔަވަޅެއް އަޅާފައި ނުވާތީ އަމުރު ބާޠިލުކުރިއެވެ. ނަމަވެސް ބަންދާމެދު ގޮތެއް ނިންމަންޖެހޭނީ މައްސަލަ ބައްލަވާ ކޯޓުން ކަމަށް ކަނޑައެޅިއެވެ.