ޕްރޮސިކިއުޓަރ ޖެނެރަލް ވ. ޢަބްދުﷲ ހައިޝަމް

ދ. ކުޑަހުވަދޫ މެޖިސްޓްރޭޓް ކޯޓުން ދެ ދަޢުވާވެސް އެކަށީގެންވާ ޝައްކެއްނެތް މިންވަރަށް ސާބިތުނުވާކަމަށް ނިންމިއެވެ. ޕްރޮސިކިއުޝަނުން އިސްތިއުނާފުކުރީ ޝަޚްޞު އޮޅުވާލުމުގެ ދަޢުވާ އެކަނިއެވެ.

ތުހުމަތުކުރެވޭ ފަރާތް، މަޝްހޫރު ފަރާތެއްގެ ނަމާއި ފޮޓޯ ބޭނުންކޮށް ފޭސްބުކް އައިޑީއެއް ހަދައި، އެކި އަންހެން ކުދިންނާ ލޯބީގެ ގޮތުން ގުޅި ބަރަހަނާ ފޮޓޯ ހޯދިކަމަށް ޝަޚްޞު އޮޅުވާލުމުގެ ދަޢުވާއާއި، ފޯނާއި ލެޕްޓޮޕުން އޮރިޔާން ފޮޓޯ ފެނުނުކަމަށް އޮރިޔާން ކާޑު ގެންގުޅުމުގެ ދަޢުވާ ކުރެވުނެވެ.

ޕްރޮސިކިއުޝަނުން ބުނީ ހެކިބަސް ލިބިފައިވާއިރު ސާބިތުނުވާކަމަށް ނިންމުމަކީ ޤާނޫނުއަސާސީއާ ޚިލާފު ކަމަށާއި، ފުލުހުންގެ ފޮޓޯ ރިޕޯޓު ޤާނޫނާ ޚިލާފު ހެއްކެއްކަމަށް ނިންމުމާއި ސިއްރު ހެކިވެރިއެއްގެ ސިއްރުކަން ގެއްލުވުން ރަނގަޅު ނޫންކަމަށެވެ. ދިފާޢުގައި ބުނީ ސިއްރު ހެކިބަސް ނެގޭނީ ބޮޑެތި މައްސަލަތަކުގައި ކަމަށާއި، ދެވަނަ އަދި ތިންވަނަ ނުކުތާއަކީ އިސްތިއުނާފީ ނުކުތާ ނޫންކަމަށެވެ.

ފޭސްބުކްގައި އެހެން މީހެއްގެ ނަމާއި ފޮޓޯ ބޭނުންކޮށް ފޭކް އައިޑީއެއް ހަދައިގެން ޝަޚްޞު އޮޅުވާލިކަމުގެ ދަޢުވާ ސާބިތުނުވާކަމަށް މެޖިސްޓްރޭޓް ކޯޓުން ނިންމުމަކީ ރަނގަޅު ނިންމުމެއްތޯ؛ ފުލުހުން ތައްޔާރުކުރި ފޮޓޯ ރިޕޯޓަކީ ޤާނޫނާ ޚިލާފަށް ހޯދި ހެއްކެއްތޯ އަދި ސިއްރު ހެކިވެރިއެއްގެ ސިއްރުކަން ގެއްލޭގޮތަށް ޙުކުމް ލިޔުމުގެ ޙުކުމް.

ދަށުކޯޓުގެ ޙުކުމް ބާޠިލު؛ ޝަޚްޞު އޮޅުވާލުމުގެ ކުށް ސާބިތުވެ، 72 ދުވަސް ޖަލަށް (ބަންދު މުއްދަތު އުނިކޮށް 47 ދުވަސް) އަދި 60,000 ރުފިޔާގެ ޖޫރިމަނާ (އަޣުލަބިއްޔަތުން)

އަޣުލަބިއްޔަތު (ނިޔާޒް، ފައިޞަލް) ދެކެވުނީ ސިއްރު ހެކިވެރިންގެ ހެކިބަހާއި ފޯނު/ލެޕްޓޮޕުގެ ފޮރެންސިކް ރިޕޯޓުތަކާއި ފޮޓޯ ރިޕޯޓުތައް ގުޅިގެން ޢަމަލު ސާބިތުވާކަމަށާއި، ނަތީޖާއަށް ފަރުވާލެއްނެތި ކުރިކަން ސާބިތުވާތީ ކުށް ސާބިތުވާކަމަށެވެ؛ އަދަބު 4 މަހާއި 24 ދުވަސް ދެބައިކޮށް ބައެއް ޖޫރިމަނާއަށް ބަދަލުކުރެވުނެވެ. ފަނޑިޔާރު ޙުސައިން ޝަހީދު ޚިލާފު ރައުޔުގައި ދެކެވުނީ އައިޑީ ބޭނުންކުރީ ތުހުމަތުކުރެވޭ ފަރާތްކަން ގުޅުވާލެވޭ ފާލަމެއް ނެތީތީ ދަށުކޯޓުގެ ނިންމުމަށް ބަދަލު ނުގެންނަންވާނެކަމަށެވެ.