ނަން ފޮރުވާފައި ވ. ދައުލަތް (މިނިސްޓްރީ އޮފް ހެލްތް)

މަދަނީ ކޯޓުން (523/MC/2008) ނިންމީ ޑޮކްޓަރު އިހުމާލުވިކަން ކަނޑައެޅެން ނެތްކަމަށާއި، އަޑުއިވުން ގެއްލުނީ ކުއްޖާގެ ހަށިގަނޑުގައިވާ ޚާއްޞިއްޔަތެއްގެ ސަބަބުން ކަމަށް ބުރަވެވޭކަމަށެވެ. ހައިކޯޓުން (2009/HC-A/368) އެ ޙުކުމް ޤާއިމުކުރިއެވެ.

ގދ. ތިނަދޫ ރީޖަނަލް ހޮސްޕިޓަލުގައި 3 އަހަރުގެ ކުއްޖަކަށް އަތުގެ އިންފެކްޝަނަކަށް ފަރުވާދިނުމުގައި ޑޮކްޓަރަކު ޖެންޓަމައިސިން ދިނުމަށްފަހު ކުއްޖާގެ ދެ ކަންފަތުގެ އަޑުއިވުން ދާއިމަށް ގެއްލުނެވެ. ޑޮކްޓަރުގެ އިހުމާލުން ވީ ގެއްލުމުގެ ބަދަލުގެ ގޮތުގައި 7,119,100 ރުފިޔާ ހޯދުމަށް ކުއްޖާގެ ބައްޕަ މިނިސްޓްރީ އޮފް ހެލްތުގެ މައްޗަށް މަދަނީ ކޯޓުގައި ދަޢުވާކުރިއެވެ.

އިލްތިމާސްކުރި ފަރާތުން ބުނީ، ދަށު ކޯޓުތަކުން ނިންމީ ބަދަލުގެނެވިފައިވާ ހޮސްޕިޓަލުގެ ރެކޯޑުތަކާއި ޙަޤީޤަތާ ޚިލާފު ހެކިބަހަށް ބިނާކޮށް ކަމަށާއި، އިހުމާލުވީކަމަށް ބެލެވޭ މީހުންގެ ބަހާއި ލިޔުންތަކަށް ބިނާކުރިކަމަށާއި، ހަށިގަނޑުގެ ޚާއްޞިއްޔަތެއްގެ ސަބަބުން ކަމަށް ނިންމީ އެއްވެސް ޓެސްޓެއް ނެތިކަމަށެވެ. ދައުލަތުން ބުނީ ޑޮކްޓަރު އިހުމާލުވެފައި ނުވާކަމަށާއި ގެއްލުން ލިބުނީ އިހުމާލުން ނޫންކަމަށެވެ.

ސަރުކާރު ހޮސްޕިޓަލެއްގައި ޑޮކްޓަރަކު ކުއްޖަކަށް ޖެންޓަމައިސިން ދިނުމުގައި އިހުމާލުވެ، އެ ކުއްޖާގެ އަޑުއިވުން ގެއްލުމުން، ގެއްލުމުގެ ބަދަލު ދައްކަން މިނިސްޓްރީ އޮފް ހެލްތް (ދައުލަތް) މަސްއޫލުވޭތޯ.

ދަށު ކޯޓުތަކުގެ ޙުކުމް ބާޠިލު (އިއްތިފާޤުން)

ޑޮކްޓަރުން ފަރުވާދޭންވާނީ މެޑިކަލް ޕްރޮފެޝަންގައި ޘާބިތުވެފައިވާ މިންގަނޑުތަކާ އެއްގޮތަށް ކަމަށާއި، އެއާ ޚިލާފުވެގެން ލިބޭ ގެއްލުމުގެ މަދަނީ މަސްއޫލިއްޔަތު ޑޮކްޓަރު ނުވަތަ އޭނާ ތަބާވާ އިދާރާއިން އުފުލަންވާނެކަމަށާއި، އެއީ ގޯސް ތަޞައްރުފާއި ގެއްލުމާއި ސަބަބީ ގުޅުން ފުރިހަމަވުމުން އުފެދޭ މަސްއޫލިއްޔަތެއްކަމަށް ސުޕްރީމް ކޯޓުން ކަނޑައެޅިއެވެ. ބަލި ޑައިގްނޯސްކުރުމާއި، ބޭހުގެ ސީރިއަސް ސައިޑް އިފެކްޓް ބެލެނިވެރިއަކަށް އެންގުމާއި، ބަރުދަން ރެކޯޑްކުރުމުގައި މިންގަނޑުތަކަށް ޢަމަލުނުކުރުމާއި، ހޮސްޕިޓަލުގެ ރެކޯޑުތަކަށް ބަދަލުގެނެވިފައިވާކަން ފޮރެންސިކް ތަޙުލީލުން ސާބިތުވުމާއި، ޖީން ޓެސްޓުން ހަށިގަނޑުގެ ޚާއްޞިއްޔަތެއް ނަފީވުމާއި ހިސާބުން އިހުމާލާއި ސަބަބީ ގުޅުން ސާބިތުވިއެވެ. ޙަދީޘް "لا ضَرر ولا ضِرار" އަށް ރިޢާޔަތްކޮށް، އެދިފައިވާ 7,119,100 ރުފިޔާއަކީ މަޢުޤޫލު ބަދަލެއްކަމަށް ކަނޑައަޅައި އެ ފައިސާ ދައުލަތުން ދައްކަން ޙުކުމްކުރެވުނެވެ.