މުޙައްމަދު ވަޙީދު އިބްރާހީމް ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ހައްޔަރުކުރީ ޤާނޫނު ނަންބަރު 5/2013 (ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނު) ގެ 13 ވަނަ މާއްދާއާ ޚިލާފަށް ކަމަށް ބެލެވޭނެ ސަބަބެއް ނެތުމާއި، ކޮންމެވެސް މިންވަރަކަށް ހެކި ހުރުމާއި، މުޖުތަމަޢުގެ ސަލާމަތަށްޓަކައި ކަސްޓޯޑިއަލް ޖަލެއްގައި ބަންދުކުރުމަށް އަމުރުކުރި.

ރައްޔިތުންގެ މަޖިލީހުގެ ގޮނޑި ހުސްވެއްޖެކަމަށް އިލެކްޝަންސް ކޮމިޝަނުން 2017/SC-C/17 ގެ ދަށުން ނިންމައި ބައި-އިލެކްޝަނަށް އިޢުލާނުކުރި މެންބަރަކު، އެ ނިންމުމާ މެދު ސުޕްރީމް ކޯޓަށް މައްސަލަ ހުށަހަޅައި ރަޖިސްޓްރީވެފައި ހުއްޓައި، ޤާނޫނު ތަންފީޛުކުރާ މުވައްޒަފެއްގެ މަސައްކަތަށް ހުރަސްއެޅުމުގެ ތުހުމަތުގައި ފުލުހުން ހައްޔަރުކުރި. ޕްރޮސިކިއުޓަރ ޖެނެރަލްގެ ބަހެއް ނުހޯދި.

އިސްތިއުނާފުކުރި ފަރާތުން ބުނީ ސުޕްރީމް ކޯޓުގައި މައްސަލަ ހުއްޓައި ބަންދުކުރީ ޤާނޫނު ނަންބަރު 5/2013 (ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ޤާނޫނު) ގެ 13 ވަނަ މާއްދާއާއި 2011/SC-C/46 އާ ޚިލާފަށް ކަމަށާއި، 44(ށ)، 45(ށ)، 59 އަދި ޤާނޫނުއަސާސީގެ 49 ވަނަ މާއްދާއަށް ރިޢާޔަތްނުކުރި ކަމަށް. ދައުލަތުން ބުނީ ގޮނޑި ހުސްވެފައިވާތީ މެންބަރެއްގެ ގޮތުގައި ނުދެކޭ ކަމަށާއި، ޤާނޫނީ އިންޒާރު ފުރިހަމައަށް ދީފައިވާ ކަމަށް.

އިލެކްޝަންސް ކޮމިޝަނުން ގޮނޑި ހުސްވެއްޖެކަމަށް ނިންމި ނިންމުމާ މެދު ސުޕްރީމް ކޯޓުގައި މައްސަލައެއް ހުއްޓައި، ރައްޔިތުންގެ މަޖިލީހުގެ މެންބަރެއް ޕްރޮސިކިއުޓަރ ޖެނެރަލްގެ ދައުރެއްނެތި ހައްޔަރުކޮށް، އެ ހައްޔަރަށް ބިނާކޮށް ބަންދުގެ މުއްދަތު އިތުރުކުރި ކްރިމިނަލް ކޯޓުގެ އަމުރަކީ ޤާނޫނީ އަމުރެއްތޯ.

ދަށުކޯޓުގެ ބަންދުގެ އަމުރު ބާޠިލު

ގޮނޑި ހުސްވިކަމާ މެދު ނިންމާނީ ސުޕްރީމް ކޯޓުން ކަމަށް ވާތީ، އެ މައްސަލަ ނިމުމުގެ ކުރިން ޕްރޮސިކިއުޓަރ ޖެނެރަލްގެ ދައުރެއްނެތި ހައްޔަރުކުރުމަކީ 13(ހ) އާ ޚިލާފު ކަމެއް ކަމަށް އަޣްލަބިއްޔަތު ދެކުނެވެ. ފަނޑިޔާރު ނިޔާޒު ދެކުނީ ސިޔާސީ ޕާޓީތަކުގެ ޤާނޫނުގެ 16(ބ) ދެމިއޮތްއިރު އޭނާ މެންބަރެއްގެ ގޮތުގައި ދެމިހުރުމުން ހައްޔަރަކީ އަޞްލުން ބާޠިލު ކަމެއް ކަމަށް.