މުޙައްމަދު ތަސްލީމް ވ. އެޓަރނީ ޖެނެރަލްގެ އޮފީސް

ކޮވިޑް-19 ގެ ސަބަބުން ފަސްކުރެވުނު ލޯކަލް ކައުންސިލް އިންތިޚާބު 2020 ގައި ވާދަކުރެވޭނީ 6 މާރިޗު 2020 ގައި އިލެކްޝަންސް ކޮމިޝަނުން ކަނޑައެޅި ކެނޑިޑޭޓުންނަށް ކަމަށް ބަޔާންކުރާ ޚާއްޞަ ޤާނޫނުގެ 3ވަނަ މާއްދާގެ (ހ) ޤާނޫނުއަސާސީއާ ޚިލާފުކަމަށް ކަނޑައަޅައި، އިތުރު ފުރުޞަތެއް ހުޅުވާލުމަށް އެދި ފަރުދަކު ހުށަހެޅިއެވެ. މައްސަލަ ފުރަތަމަ ސުޕްރީމް ކޯޓަށް ހުށަހެޅުމުން ރަޖިސްޓްރާރު ބަލައިނުގަތެވެ.

ހުށަހެޅި ފަރާތުން ބުނީ މި މައްސަލައަކީ މުޅި ޤައުމުގެ ޢާންމު މަޞްލަޙަތާ ގުޅުންހުރި މައްސަލައެއް ނޫންކަމަށް ސުޕްރީމް ކޯޓުން ޖަވާބުދީފައިވާތީ ހައިކޯޓަށް ބެލޭނެކަމަށެވެ. ދައުލަތާއި ތަދައްޚުލްވި އިލެކްޝަންސް ކޮމިޝަނުން ވެސް 2020/HC-DM/02 ގެ އުޞޫލަށް ބަލައި ހައިކޯޓަށް ފުރަތަމަ މަރުޙަލާގައި ބެލޭނެކަމަށް ބުންޏެވެ.

ލޯކަލް ކައުންސިލްތަކުގެ އިންތިޚާބުގެ ޚާއްޞަ ޤާނޫނުގެ 3ވަނަ މާއްދާގެ (ހ) ޤާނޫނުއަސާސީއާ ޚިލާފުކަމަށް ބުނެ ހުށަހެޅި ދުސްތޫރީ މައްސަލައަކީ ހައިކޯޓަށް ފުރަތަމަ މަރުޙަލާގައި ބެލުމުގެ އިޚްތިޞާޞް ލިބިގެންވާ މައްސަލައެއްތޯ، ނުވަތަ ޤައުމުގެ ޢާންމު މަޞްލަޙަތާ ގުޅިފައިވާތީ ސުޕްރީމް ކޯޓުގެ އަސްލީ އިޚްތިޞާޞްގެ ދަށަށް ވެއްޓޭ މައްސަލައެއްތޯ.

މައްސަލަ ހައިކޯޓުގައި ކުރިއަށް ނުގެންދެވޭނެކަމަށް ނިންމި (މައުޟޫޢީ ގޮތުން ގޮތެއް ނުނިންމާ)

ކޯޓުތަކުގެ ޤާނޫނުގެ 37ވަނަ މާއްދާ ކިޔަންޖެހޭނީ ދިވެހިރާއްޖޭގެ ކޯޓުތަކުގެ ޤާނޫނުގެ 11 ވަނަ މާއްދާއާ އެކީގައި ކަމާއި، ރަޖިސްޓްރާރުގެ ނިންމުމުގައި މައްސަލައަކީ ޢާންމު މަޞްލަޙަތާ ނުގުޅޭ މައްސަލައެއްކަމަށް ބުނެފައި ނެތުމާއި، ޤައުމު އޮތް ޙާލަތަށް ބަލާއިރު ޢާންމު މަޞްލަޙަތާ ގުޅުމެއް ނެތް މައްސަލައެއްކަން ނޭނގޭތީ ހައިކޯޓުގައި ކުރިއަށް ނުގެންދެވޭނެކަމަށް ކޯޓު ނިންމިއެވެ.