މީޑިއާ ރިންގް ޕވޓ ލޓޑ ވ. ޒައިދު ޢަބްދުﷲ

ވަޒީފާއާބެހޭ ޓްރައިބިއުނަލުން ކަނޑައެޅީ ރިޑަންޑަންސީގެ ޙަޤީޤީ ޙާލަތެއް އޮތްކަން ސާބިތުނުވާތީ މައުޟޫޢީ އަދި އިޖުރާއީ ޢަދުލުވެރިކަން ގާއިމުނުވާ ކަމަށާއި، މުވައްޒަފު ވަޒީފާއަށް ރުޖޫޢުކޮށް، ނޯޓިސްގެ ބަދަލުގައި ދިން ފައިސާއާއި އެހެން ވަޒީފާއިން ލިބޭ މުސާރަ އުނިކޮށް ބަދަލު ދިނުމަށެވެ. ކުންފުނީގެ ޣައިރު ޙާޟިރުގައި ނިންމިއެވެ.

ޗެނަލް 13 ގެ ކެމެރާމަނެއްގެ މަޤާމުގައި ހުރި މުވައްޒަފު، ކުންފުނީގެ މާލީ ޙާލަތު ދަށްވެ ބޯޑުން އޮނިގަނޑު އިޞްލާޙުކޮށް މުވައްޒަފުން މަދުކުރަން ނިންމި ކަމަށް ބުނެ 25 އޮކްޓޯބަރު 2018 ގައި ކުއްލިގޮތެއްގައި ވަޒީފާއިން ވަކިކުރިއެވެ.

ކުންފުނިން ބުނީ ޓްރައިބިއުނަލުން ވަޒީފާ އެއްބަސްވުމުގެ ރިޑަންޑަންސީއާ ބެހޭ މާއްދާއަށް ރިޢާޔަތްނުކުރި ކަމަށާއި، މުވައްޒަފަކީ ކޮންޓްރެކްޓް މުވައްޒަފެއް ކަމުން ވަޒީފާ އިޢާދަނުކުރެވޭނެ ކަމަށާއި، ބަދަލު ނަގައިދިން ގޮތަކީ މަތީ ކޯޓުތަކުގެ ނިންމުންތަކާ ޚިލާފު ކަމަށާއި، ޚުލާޞާކޮށް ވާހަކަ ދެއްކުމާއި އިތުރު ހެކި ހުށަހެޅުމުގެ ފުރުޞަތު ނުދިން ކަމަށެވެ.

ކުންފުނީގެ މާލީ ޙާލަތު ދަށްވުމުގެ ސަބަބުން ރިޑަންޑަންސީގެ ނަމުގައި މުވައްޒަފަކު ވަޒީފާއިން ވަކިކުރުމުގައި މައުޟޫޢީ އަދި އިޖުރާއީ ޢަދުލުވެރިކަން ގާއިމުވިތޯ، ވަކި މުއްދަތެއްގެ އެއްބަސްވުމެއްގައި ހުރި މުވައްޒަފަކު ވަޒީފާއަށް އަނބުރާ ރުޖޫޢުކުރުމަށް ނިންމުމާއި ބަދަލު ހިސާބުކުރި ގޮތް ރަނގަޅުތޯ، އަދި ޓްރައިބިއުނަލުން ޚުލާޞާކޮށް ވާހަކަ ދެއްކުމުގެ ފުރުޞަތު ނުދީ ނިންމިތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުންފުނިން ހުށަހެޅި ސިޓީތަކަކީ ވަކިކުރުމަށްފަހު ލިބުނު ސިޓީތައް ކަމުން ރިޑަންޑަންސީގެ ޙަޤީޤީ ޙާލަތެއް ސާބިތުނުވާތީ މައުޟޫޢީ ޢަދުލުވެރިކަން ނެތްކަމާއި، 2 އަހަރަށްވުރެ ދިގުވާ ގޮތަށް އާކުރި އެއްބަސްވުމަކީ ވަކި މުއްދަތެއްގެ އެއްބަސްވުމެއް ނޫންކަމާއި، ބަދަލު ހިސާބުކުރި ގޮތް ޢަދުލުވެރިކަމާއި، ކުންފުނީގެ ފުރުޞަތު ގެއްލުނީ ޙާޟިރުނުވުމުން ކަމަށް ބަލައި ޓްރައިބިއުނަލުގެ ނިންމުން ޤާއިމުކުރިއެވެ.