މޯލްޑިވްސް ޕޮލިސް ސަރވިސް ވ. ރުޝްދީ މުޙައްމަދު

ކައުންސިލުގެ ޢުޛުރު ބަލައިގެން، ކައުންސިލާ ގުޅިގެން ފާރު ތަޅާލައި ގޯތީގެ މިން ހަމަކޮށްދިނުމަށް 15 ދުވަހުގެ ތެރޭގައި މޯލްޑިވްސް ޕޮލިސް ސަރވިސްއަށް ދިއްފުށީ މެޖިސްޓްރޭޓް ކޯޓުން އަމުރުކުރިއެވެ.

ދެ ގޯއްޗާ ދެމެދު އިމުގެ 14 އިންޗި އަރުވާ ފާރު ރާނާފައިވާ މައްސަލައެއްގައި، އިން ހަމަކޮށްދިނުމަށް ކައުންސިލަށް އަންގާ ކުރި ޙުކުމް ތަންފީޛުކޮށްދިނުމަށް އެދި ހުށަހެޅިއެވެ. މާލީ ތަނަވަސްކަމާއި މުވައްޒަފުން ނެތުމުން ތަންފީޛު ނުކުރެވޭ ކަމަށް ކައުންސިލުން ބުނެ، ފުލުހުންނަށް އަމުރުކުރުމަށް އެދުނެވެ.

ދައުލަތުން ބުނީ 2014/HC-A/250 ގައިވާ ގޮތުގެ ޚިލާފަށް ފުލުހުންގެ ބަހެއް ނުހޯދައި އަމުރުކުރި ކަމަށެވެ. ރައްދުވާ ފަރާތުން ބުނީ އެ މައްސަލައަކީ ތަފާތު މައްސަލައެއް ކަމަށާއި ތަންފީޛުގެ މައްސަލައިގައި ފުލުހުންގެ ބަސް ހޯދުމުގެ އުޞޫލެއް ނެތް ކަމަށެވެ. ކައުންސިލުން ބުނީ ފުލުހުންގެ އެހީ ނެތި ޙައްލުނުކުރެވޭނެ ކަމަށެވެ.

ޙުކުމެއް ތަންފީޛުކުރުމުގެ މައްސަލައެއްގައި، މޯލްޑިވްސް ޕޮލިސް ސަރވިސްގެ ބަހެއް ނުހޯދައި، ގޯތީގެ ފާރު ތަޅާލައި އިން ހަމަކޮށްދިނުމަށް ފުލުހުންގެ މައްޗަށް އަމުރުކުރެވިދާނެތޯ.

ދަށުކޯޓުގެ ޙުކުމް ބާޠިލު، އަލުން ބެލުމަށް ފޮނުވި

ތަންފީޛުކުރަން އެދުނު ޙުކުމުގައި ފުލުހުންގެ ދައުރެއް ނެތްކަމާއި، ދަށުކޯޓުން ކުރީ ފުލުހުންގެ އެހީ ހޯދުމުގެ ބަދަލުގައި ފުލުހުން މެދުވެރިކޮށް ތަންފީޛުކުރުންކަމާއި، ފުލުހުންގެ ބަހެއް ނުހޯދައި އަދި އެއީ ފުލުހުންނަށް ކުރެވޭނެ މަސައްކަތެއްތޯ ނުބަލައި އަމުރުކުރުމަކީ 2014/HC-A/250 ގައިވާ ޠަބީޢީ ޢަދާލަތުގެ އުޞޫލުތަކާ ޚިލާފު ކަމެއްކަމުން ޙުކުމް ބާޠިލުކޮށް އަލުން ބެލުމަށް ފޮނުވިއެވެ.