އިސްމާޢީލް ނަޞީރު ވ. އިބްރާހީމް ރަޝީދު މޫސާ

ސިވިލް ކޯޓުން ހަވީރާ ގުޅޭ މުދަލާއި ވިޔަފާރިތައް މެޖޯރިޓީ ޙިއްޞާދާރުން ކަނޑައަޅާ ގޮތަކަށް ބަދަލުކުރުމަށް އަންގައި، ހަވީރުގެ މުވައްޒަފުން 2 އަހަރަށް އެހެން މީޑިއާއެއްގައި ވަޒީފާ އަދާކުރުން ހުއްދަ ނޫންކަމަށް ކަނޑައަޅައި، ކުންފުނީގެ ނަން ބަދަލުކުރުމަށާއި އޮޑިޓްކުރުމަށް އަމުރުކުރިއެވެ.

ހަވީރު ނޫސް އެޖެންސީގެ ފައުންޑަރުންގެ މިލްކުވެރިކަމާ ގުޅޭ މައްސަލައެއްގައި ސިވިލް ކޯޓުން ކުރި ޙުކުމުގައި، ހަވީރަށް ނިސްބަތްވާ ވިޔަފާރިތަކުގައި ހަވީރު މީޑިއާ ގްރޫޕް ޕްރައިވެޓް ލިމިޓެޑާ ކޮންޓްރެކްޓްވެ ވަޒީފާ އަދާކުރި މުވައްޒަފުން 2 އަހަރަށް އެހެން މީޑިއާއެއްގައި ވަޒީފާ އަދާކުރުން މަނާކުރިއެވެ. އިސްތިއުނާފުކުރި ފަރާތަކީ އެ ކުންފުނީގެ ވަޒީފާއިން ވަކިވެފައިވާ މުވައްޒަފެކެވެ.

އިސްތިއުނާފުކުރި ފަރާތުން ބުނީ، ޚަޞްމެއްގެ ގޮތުގައި ނުހިމެނޭ އޭނާގެ ބަސް ނުހޯދާ އޭނާގެ މައްޗަށް އިލްތިޒާމު އުފެދޭ ގޮތަށާއި ވަޒީފާ އަދާކުރުމުގެ ޙައްޤުން މަޙްރޫމުވާ ގޮތަށް ޙުކުމްކުރީ ޤާނޫނުއަސާސީގެ 42 އަދި 37 ވަނަ މާއްދާއާ ޚިލާފަށް ކަމަށެވެ. އިސްތިއުނާފު ރައްދުވާ ފަރާތުން ބުނީ މީޑިއާގެ ވަޒީފާގެ އެއްބަސްވުންތަކުގައި ނޮން-ކޮމްޕީޓް ޝަރުޠު ހިމެނޭނެ ކަމަށެވެ.

ހަވީރު ނޫހުގެ ފައުންޑަރުންގެ ދެމެދު ބެލި ސިވިލް ކޯޓުގެ 220/Cv-C/2016 ޤަޟިއްޔާގައި ޚަޞްމެއްގެ ގޮތުގައި ނުހިމެނޭ މުވައްޒަފެއްގެ ބަސް ނުހޯދާ، ހަވީރަށް ނިސްބަތްވާ ވިޔަފާރިތައް ފިޔަވައި އެހެން މީޑިއާއެއްގައި 2 އަހަރަށް ވަޒީފާ އަދާކުރުން މަނާކޮށް ޙުކުމްކުރުމަކީ ޤާނޫނުއަސާސީގެ 42 ވަނަ މާއްދާ އާއި 37 ވަނަ މާއްދާގެ (ހ) އާ ޚިލާފު ކަމެއްތޯ؛ އަދި އެ ޙުކުމް އެހެން އިސްތިއުނާފެއްގައި ބާޠިލްކޮށް އަލުން ބެލުމަށް ފޮނުވާފައިވާއިރު އިތުރު ގޮތެއް ކަނޑައެޅެންޖެހޭތޯ.

ދަށުކޯޓުގެ ޙުކުމް 2016/HC-A/310 ގައި ބާޠިލްކޮށް އަލުން ބެލުމަށް ފޮނުވާފައިވާތީ އިތުރު ގޮތެއް ކަނޑައަޅާނެ ތަނެއް ނެތް

ކޯޓަށް ފެނުނީ އިސްތިއުނާފުކުރި ފަރާތުގެ ބަސް ނުހޯދާ ޙުކުމްކުރުމާއި، ވަޒީފާގެ އެއްބަސްވުމުގައި ނޮން-ކޮމްޕީޓް ޝަރުޠެއް ނެތްއިރު ވަޒީފާގެ ދާއިރާ ފުޅާކޮށް މަނާކުރުމަކީ އެކަށީގެންވާ ގޮތެއް ނޫންކަމެވެ. ނަމަވެސް، އެ ޙުކުމް 2016/HC-A/310 ގައި ބާޠިލްކޮށް އަލުން ބެލުމަށް ސިވިލް ކޯޓަށް ފޮނުވާފައިވާތީ، އިތުރު ގޮތެއް ކަނޑައަޅާނެ ތަނެއް ނެތްކަމަށް ކަނޑައެޅިއެވެ.