ކޮމްޕިއުޓަރ ޕްލަސް ވ. އާމިނަތު ޢަބްދުއްރަޝީދު

ވަޒީފާއާބެހޭ ޓްރައިބިއުނަލުން މައުޟޫޢީ ޢަދުލުވެރިކަން ޤާއިމުނުކޮށް ވަކިކުރީކަމަށް ކަނޑައަޅައި، ވަޒީފާއަށް އިޢާދަކުރުމުގެ ބަދަލުގައި 32,800 ރުފިޔާ ބަދަލާއި 8,200 ރުފިޔާގެ އަހަރީ ޗުއްޓީގެ ފައިސާ (ޖުމްލަ 41,000 ރުފިޔާ) ދިނުމަށް ނިންމި.

ސޭލްސް އެންޑް މާކެޓިންގ މަޤާމެއްގައި ހުރި މުވައްޒަފަކު، ހުއްދަނެތި ވަޒީފާއަށް ޙާޟިރުނުވުމާއި އެޓިޓިއުޑްގެ ސަބަބުން ކުންފުނީގެ ޕޮލިސީއާ އެއްގޮތަށް ވަކިކުރީކަމަށް ބުނެ، ނޯޓިހެއް ނުދީ 16 ފެބުރުވަރީ 2017 ގައި ވަޒީފާއިން ވަކިކުރި.

ކުންފުނިން ބުނީ ޓްރައިބިއުނަލުން ހެކިތަކާއި ވަށައިގެންވާ ކަންކަމަށް ފުރިހަމައަށް ރިޢާޔަތްނުކޮށް ޢަދުލުވެރިކަން ޤާއިމުނުކުރާކަމަށް ނިންމި ކަމަށާއި، ފަސްޓް ރިމައިންޑަރ އަދި ފައިނަލް ރިމައިންޑަރ ފޮނުވާފައިވާ ކަމަށެވެ. މުވައްޒަފު ބުނީ އެ ލިޔުންތައް އޭނާއަށް ނުލިބޭ ކަމަށެވެ.

ހާޟިރީއާއި އެޓިޓިއުޑުގެ ސަބަބުން ނޯޓިހެއް ނުދީ މުވައްޒަފަކު ވަޒީފާއިން ވަކިކުރުމުގައި މައުޟޫޢީ އަދި އިޖްރާޢީ ޢަދުލުވެރިކަން ޤާއިމުކޮށްފައިނުވާކަމަށް ކަނޑައަޅައި ބަދަލު ދިނުމަށް ވަޒީފާއާބެހޭ ޓްރައިބިއުނަލުން ނިންމުމުގައި ހެކިތަކަށް ފުރިހަމައަށް ރިޢާޔަތްކޮށްފައިވޭތޯ.

އިސްތިއުނާފު ބާޠިލު، ޓްރައިބިއުނަލްގެ ނިންމުން ޤާއިމް

ނަޞޭޙަތާއި އިންޒާރު ދިންކަން ސާބިތުވާ ހެއްކެއް ނެތުމާއި، ޤާނޫނު ނަންބަރު 2/2008 (ވަޒީފާއާބެހޭ ޤާނޫނު) ގެ 19 ވަނަ މާއްދާގެ ފިޔަވަޅު ނާޅާ، ތަޙްޤީޤެއް ނުކޮށް، ޖަވާބުދާރީވުމުގެ ފުރުޞަތު ނުދީ ވަކިކުރުމުން މައުޟޫޢީ އަދި އިޖްރާޢީ ޢަދުލުވެރިކަން ޤާއިމުވެފައިނުވާތީ، ޓްރައިބިއުނަލްގެ ނިންމުމަށް ބަދަލު ގެންނަންޖެހޭ ސަބަބެއް ނެތް.