އަޙްމަދު ޢަބްދުﷲ ސަޢީދު ވ. އިބްރާހީމް ރަޝީދު މޫސާ

ސިވިލް ކޯޓުން ހަވީރުގެ މުދާ ފައުންޑަރުންނަށް ހަމަހަމައަށް ކަމަށް ކަނޑައަޅައި، އެތަންތާގައި ވަޒީފާ އަދާކުރި މުވައްޒަފުންނަށް 2 އަހަރު ދުވަހު ހަވީރާ ނުގުޅޭ މީޑިއާއެއްގައި ބައިވެރިވުމާއި ވަޒީފާ އަދާކުރުން ހުއްދަ ނޫންކަމަށް ޙުކުމްކުރިއެވެ.

ހަވީރު ނޫހުގެ ފައުންޑަރުންތަކެއް ހަވީރުގެ މުދަލާއި ވިޔަފާރި ހަވީރު މީޑިއާ ގްރޫޕަށް ބަދަލުކުރުމާ ގުޅިގެން ސިވިލް ކޯޓަށް ދަޢުވާކުރިއެވެ. އިސްތިއުނާފުކުރި ފަރާތަކީ އެ ދަޢުވާގެ ޚަޞްމެއް ނޫން، ހަވީރު މީޑިއާ ގްރޫޕްގައި ވަޒީފާ އަދާކޮށް ވަކިވި ފަރާތެކެވެ.

އިސްތިއުނާފުކުރި ފަރާތުން ބުނީ ޚަޞްމެއް ނޫން އޭނާގެ ބަސް ނާހައި ޙުކުމްކުރީ ޤާނޫނުއަސާސީގެ 42 ވަނަ މާއްދާއާއި 2010/HC-A/226 އާ ޚިލާފަށްކަމަށާއި، 37 (ހ) ގައިވާ ވަޒީފާގެ ޙައްޤުން މަޙްރޫމުކުރީކަމަށެވެ. ރައްދުވާ ފަރާތުން ބުނީ މީޑިއާގެ ވަޒީފާތަކުގައި ނޮން-ކޮމްޕީޓް ޝަރުޠު ހުންނާނެކަމަށެވެ.

ޚަޞްމެއްގެ ގޮތުގައި ނުހިމެނޭ، ބަސް ނާހާ ފަރާތެއްގެ މައްޗަށް 2 އަހަރަށް ހަވީރާ ނުގުޅޭ މީޑިއާއެއްގައި ވަޒީފާ އަދާކުރުން މަނާކޮށް ސިވިލް ކޯޓުން ކުރި ޙުކުމަކީ ޤާނޫނުއަސާސީގެ 42 ވަނަ މާއްދާއާއި 37 ވަނަ މާއްދާގެ (ހ) އާ ޚިލާފު ޙުކުމެއްތޯ، އަދި އެ ޙުކުމް އެހެން އިސްތިއުނާފެއްގައި ބާޠިލުކޮށްފައިވާއިރު އިތުރު ގޮތެއް ކަނޑައަޅަންޖެހޭތޯ.

ދަށުކޯޓުގެ ޙުކުމް އެހެން ޤަޟިއްޔާއެއްގައި ބާޠިލުކޮށްފައިވާތީ އިތުރު ގޮތެއް ނުކަނޑައަޅާ

އިސްތިއުނާފުކުރި ފަރާތަކީ ޙުކުމް ނިސްބަތްވާ ފަރާތެއްކަމުގައި ވާއިރު ބަސް ނާހާތީ 2010/HC-A/226 ތަޠުބީޤުވާކަމަށާއި، ވަޒީފާގެ އެއްބަސްވުމުގައި ނޮން-ކޮމްޕީޓް ޝަރުޠެއް ނެތް، މަނާކުރުން އެކަށީގެން ނުވާތީ ނުކުތާ ޤަބޫލުކުރެވޭކަމަށް ބުނެ، ނަމަވެސް ޙުކުމް 2016/HC-A/310 ގައި ބާޠިލުކޮށް ތަޙްވީލުކޮށްފައިވާތީ އިތުރު ގޮތެއް ނުކަނޑައަޅައިފިއެވެ.