އިބްރާހީމް ޒަރީރު ވ. އިބްރާހީމް ޔޫސުފް

ސިވިލް ކޯޓުން ނުދައްކާ ހުރި ފައިސާއާއި ވަކީލުގެ އުޖޫރައާއި ޖަޒާއީ ޝަރުތުގެ ދަށުން 286,192,032 ރުފިޔާ ގަތް ފަރާތާއި ޗެކު ދޫކުރި ފަރާތުން ދޭންޖެހޭކަމަށް ޙުކުމްކުރިއެވެ.

ޓޫރިސްޓް ވިޔަފާރީގައި ބޭނުންކުރާ ގެސްޓް މުދާ 240,000 ރުފިޔާއަށް ގަތުމަށް ވެވުނު އެއްބަސްވުމެއްގެ ދަށުން ނުދައްކާ ހުރި 227,570 ރުފިޔާއާއި، ފައިސާ ނުލިބޭ ކޮންމެ ދުވަހަކަށް 80% ގެ ޖޫރިމަނާއާއި ވަކީލުގެ އުޖޫރަ ހޯދުމަށް ވިއްކި ފަރާތުން ދަޢުވާކުރިއެވެ.

އިސްތިއުނާފުކުރި ފަރާތްތަކުން ބުނީ ޖަޒާއީ ޝަރުތު މުޠުލަޤަށް ތަންފީޛުކުރުމަކީ ޝަރީޢަތާއި 2013/SC-A/27 އާއި Unfair Contract Terms ގެ އުޞޫލުތަކާ ޚިލާފު ކަމަށާއި، ޖޫރިމަނާ ގެއްލުމާ ނުބައްދަލު ކަމަށެވެ. ރައްދުވާ ފަރާތުން ބުނީ އެއްބަސްވުމުގައި ސާފުކޮށް ހުރި ގޮތަށް ފައިސާ ލިބެންވާނެ ކަމަށެވެ.

ވިޔަފާރި އެއްބަސްވުމެއްގައިވާ ޖަޒާއީ ޝަރުތު (ދުވާލަކަށް 80% ޖޫރިމަނާ) މުޠުލަޤަށް ތަންފީޛުކޮށް، ނުދައްކާ ހުރި އަޞްލު ޢަދަދަށްވުރެ އެތައް ހާސް ގުނަ ބޮޑު ޖޫރިމަނާއެއް ނަގައިދިނުމަކީ ރަނގަޅު ނިންމުމެއްތޯ؛ އަދި ޖަޒާއީ ޝަރުތުގެ ދަށުން ނަގައިދެވޭ މިންވަރު ކޯޓުން ކުޑަކުރެވޭތޯ.

ބައެއް ބަދަލުކުރި (އަޞްލު ފައިސާއާއި ވަކީލުގެ އުޖޫރަ ދޭން ކަނޑައެޅި ބަޔަށް ތާއީދުކޮށް، 286,192,032 ރުފިޔާގެ ޖޫރިމަނާގެ ބައި ބާޠިލުކޮށް، ޖޫރިމަނާ ނުދައްކާ ހުރި 227,570 ރުފިޔާއަށްވުރެ ބޮޑުވެގެން ނުވާނެކަމަށް)

ޖަޒާއީ ޝަރުތު ހުއްދަ ނަމަވެސް، ބަދަލަކީ އެކަށީގެންވާ މިންވަރަކަށް ވާންޖެހޭނެކަމަށް 2015/SC-A/16 ގައި ކަނޑައަޅާފައިވާތީ، އަޞްލު އިލްތިޒާމަށްވުރެ އެތައް ހާސް ގުނަ ބޮޑު ޖޫރިމަނާއަކީ ތަޢައްސުފު ކޮށް ކަނޑައަޅާފައިވާ މިންވަރެކެވެ. ގެއްލުން އެއަށްވުރެ ބޮޑުކަން ސާބިތުނުވާތީ ޖޫރިމަނާ ނުދައްކާ ހުރި ޢަދަދަށް ހަނިކުރެވެއެވެ.