ޙުސައިން އަފީފް ވ. ސިވިލް ސަރވިސް ކޮމިޝަން

ވަޒީފާއާބެހޭ ޓްރައިބިއުނަލުން ވަކިކުރީ އެކަށީގެންވާ ސަބަބަކާހުރެ ކަމަށް ކަނޑައަޅައި ވަޒީފާ އަނބުރާ ދިނުމަށް ނުއަންގައި، ނަމަވެސް އިޖްރާއީ ޢަދުލުވެރިކަން ސާބިތުނުވާތީ 19,995 ރުފިޔާ ބަދަލު ދިނުމަށް ޙުކުމްކުރިއެވެ.

ލ.އިސްދޫ ކައުންސިލްގެ އިދާރާގެ އެސިސްޓެންޓް އެޑްމިނިސްޓްރޭޓިވް އޮފިސަރަކު ބަލިވެގެން މާލެ އައިސް ޗުއްޓީ ހުސްވުމުން 1 އަހަރުގެ މުސާރަ ނުލިބޭ ޗުއްޓީއަކަށް އެދުނެވެ. އިދާރާއިން ލިޔެކިޔުން ފުރިހަމަނުވާތީ ޗުއްޓީ ނުދީ ޙާޟިރުވުމަށް އެންގިއިރުވެސް ޙާޟިރުނުވުމުން 10 މާރިޗު 2016 ގައި ވަޒީފާއިން ވަކިކުރިއެވެ.

އިސްތިއުނާފުކުރި ފަރާތުން ބުނީ ޓްރައިބިއުނަލުގެ ނިންމުމަކީ ވަޒީފާއާބެހޭ ޤާނޫނުގެ 21، 23، 74 ވަނަ މާއްދާއާއި ސިވިލް ސަރވިސް ޤާނޫނުގެ 34، 47 ވަނަ މާއްދާއާއި ސިވިލް ސަރވިސް ގަވާއިދުގެ 195، 197، 198، 272 ވަނަ މާއްދާއާ ޚިލާފު ނިންމުމެއް ކަމަށެވެ.

ބަލިވެގެން ޗުއްޓީއަށް އެދުނު ސިވިލް ސަރވިސްގެ މުވައްޒަފަކު، ޗުއްޓީ ހަމަޖެހުމަކާނުލައި ވަޒީފާއަށް ޙާޟިރުނުވާތީ ވަޒީފާއިން ވަކިކުރުމުގައި މައުޟޫޢީ ޢަދުލުވެރިކަން ޤާއިމްވެފައިވޭތޯއާއި، އިޖްރާއީ ޢަދުލުވެރިކަން ނެތުމުން ބަދަލު ކަނޑައެޅި ޓްރައިބިއުނަލުގެ ނިންމުމަށް ބަދަލު ގެންނަންޖެހޭތޯ.

އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ހުއްދަ ނުލިބި ޙާޟިރުނުވާތީ ވަކިކުރުމުގައި މައުޟޫޢީ ޢަދުލުވެރިކަން ޤާއިމްވެފައިވާއިރު، މެޑިކަލް ލިޔުންތަކުން ޞިއްޙަތަށް ބޮޑު ގެއްލުމެއް ލިބިދާނެކަން ނުދައްކައެވެ. އިންޒާރާއި އިޞްލާޙީ ފިޔަވަޅު ނުއަޅާތީ އިޖްރާއީ ޢަދުލުވެރިކަން ނެތްކަމުގައި ޓްރައިބިއުނަލުން ނިންމި ނިންމުމަށް ބަދަލު ގެންނަންޖެހޭ ސަބަބެއް ނެތެވެ.