ޙުސައިން ޢާމިރު ވ. ޢަބްދުއްރަޙްމާން ޢަބްދުއްރަޙީމް

ފައިސާ އަދާކުރެވިފައިނުވާކަން ސާބިތުވާތީ އެއްބަސްވުމުގެ 7 ވަނަ މާއްދާއަށް ރިޢާޔަތްކޮށް 20 ދުވަހުގެ ތެރޭގައި ދޯނި ވެރިފަރާތާ ޙަވާލުކުރުމަށް ސިވިލް ކޯޓުން ޙުކުމްކުރިއެވެ.

ދޮންދޫނި ފައިބަރު ދޯނި 600,000 ރުފިޔާއަށް ވިއްކުމަށް ދެފަރާތް އެއްބަސްވެ، ގަތް ފަރާތުން 330,000 ރުފިޔާ ނުދެއްކުމުން، އެއްބަސްވުމުގެ 7 ވަނަ މާއްދާގެ ދަށުން ދޯނި އަނބުރާ ހޯދުމަށާއި ގެއްލުމުގެ ބަދަލަށް ވިއްކި ފަރާތުން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ފައިސާ ދެއްކުމުގައި ދަތިވުމުން ދޯނި މޯގޭޖްކޮށް ލޯނު ނަގައިގެން ދެއްކުމަށް އެއްބަސްވެ ޕަވަރ އޮފް އެޓަރނީ ދީފައިވާތީ ޕްރޮމިސަރީ އެސްޓޮޕެލްގެ މަންފާ ލިބެންޖެހޭ ކަމަށާއި، ކޮންޓްރެކްޓާބެހޭ ޤާނޫނުގެ 20 (ހ) ގެ ދަށުން ލުއި ދީފައިވާކަމަށް ހެކިބަހަށް ރިޢާޔަތްނުކުރާ ކަމަށެވެ.

ދޯނި ވިއްކުމުގެ އެއްބަސްވުމުގައި ފައިސާ ނުދައްކައިފިނަމަ ދޯނި އަނބުރާ ހޯދުމުގެ ޙައްޤު ވިއްކި ފަރާތަށް ދީފައިވާ ޙާލަތެއްގައި، ދޯނި މޯގޭޖްކޮށް ލޯނު ނަގަން ޕަވަރ އޮފް އެޓަރނީ ދިނުމަކީ ފައިސާ ދެއްކުމުގެ ޝަރުޠު ބަދަލުކުރާ ވަޢުދެއްކަމަށް ބަލައި ޕްރޮމިސަރީ އެސްޓޮޕެލްގެ މަންފާ ގަތް ފަރާތަށް ލިބިދޭންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޕަވަރ އޮފް އެޓަރނީ ދީފައިވަނީ އެއްބަސްވުމުގައި ސޮއިކުރި މަހު ކަމަށާއި، އެއީ އަގު ދެއްކުމަށް ނަގާ ލޯނަކަށްކަން ބަޔާންވެފައި ނުވާތީއާއި ހެކިބަހުންވެސް ސާބިތުނުވާތީ، ފައިސާ ދެއްކުމުގެ ޝަރުޠު ބަދަލުކުރާ ވަޢުދެއް ސާބިތުނުވާކަމަށް ކޯޓުން ނިންމިއެވެ. ވިއްކި ފަރާތުން ދޯނި އަނބުރާ ހޯދަން މަސައްކަތްކޮށްފައިވާކަން ހެކިބަހުން ސާބިތުވެއެވެ.