ޙަސަން ޢަލީމަނިކު ވ. އަޙްމަދު ޖަނާޙް

ބާކީ 346,500 ޑޮލަރާއި ޝަރުތު ޖަޒާއީގެ ގޮތުގައި 700,000 ޑޮލަރު، ޖުމްލަ 1,046,500 ޑޮލަރު 6 މަސްދުވަހުގެ ތެރޭގައި ދައްކަން ސިވިލް ކޯޓުން ޙުކުމްކުރިއެވެ.

ކުންފުންޏެއްގެ 33% ހިއްސާ 700,000 ޔޫއެސް ޑޮލަރަށް ވިއްކުމަށް 08 ފެބްރުއަރީ 2007 ގައި ވި އެއްބަސްވުމުގެ 11 ވަނަ މާއްދާގައި، ފައިސާ ނުދައްކާ ލަސްވާ ކޮންމެ 10 ދުވަހަކަށް ނުދައްކާ ފައިސާގެ 10% ޖޫރިމަނާގެ ގޮތުގައި ނެގޭނެކަމަށް އޮތެވެ. ގަތް ފަރާތުން ބާކީ ފައިސާ ނުދެއްކުމުން ވިއްކި ފަރާތުން ބާކީ ފައިސާއާއި ޖޫރިމަނާއަށް ދަޢުވާ ކުރިއެވެ.

އިސްތިއުނާފުކުރި ފަރާތުން ބުނީ ބަދަލު ކަނޑައަޅަން ޖެހޭނީ ނުދައްކާ ފައިސާގެ މިންވަރަށް ބަލައިގެން ކަމަށާއި، ސުޕްރީމް ކޯޓުގެ 2015/SC-A/16 ގެ އުޞޫލާ ޚިލާފަށް ނިންމި ކަމަށާއި، ނަގައިދިން މިންވަރު އެކަށީގެންވާ ވަރަށްވުރެ ބޮޑު ކަމަށެވެ. އެއްބަސްވުމާއި 11 ވަނަ މާއްދާއާއި ފައިސާ ނުދެއްކިކަން އިންކާރެއް ނުކުރެއެވެ.

ހިއްސާ ވިއްކުމުގެ އެއްބަސްވުމުގައި ފައިސާ ދެއްކުން ލަސްވުމުން 'ޝަރުތު ޖަޒާއީ' ގެ ގޮތުގައި ޖޫރިމަނާ ނެގޭނެކަމަށް ކުރިއާލައި އެއްބަސްވެފައިވާ މާއްދާގެ ދަށުން ބަދަލު ނަގައިދިނުމަކީ ސުޕްރީމް ކޯޓުގެ 2015/SC-A/16 ގެ އުޞޫލާ ޚިލާފު ކަމެއް ތޯ، އަދި ނަގައިދިން މިންވަރަކީ އެކަށީގެންވާ މިންވަރަށްވުރެ ބޮޑު މިންވަރެއް ތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކުރިއާލައި އެއްބަސްވެފައިވާ ޝަރުތު ޖަޒާއީ ނަގައިދިނުމަކީ ކޮންޓްރެކްޓާބެހޭ ޤާނޫނު ތަންދޭ ކަމެކެވެ. 2015/SC-A/16 އަކީ އިންވޮއިސްގައި އެކަނި ޖޫރިމަނާ ބަޔާންކުރި ތަފާތު ޙާލަތެކެވެ. 5,262,600 ޑޮލަރަށް އެދުނު އިރު 700,000 ޑޮލަރު ކަނޑައެޅުމަކީ އެކަށީގެންވާ މިންވަރަށްވުރެ ބޮޑު ކަމެއް ނޫނެވެ.