ސިވިލް ސަރވިސް ކޮމިޝަން ވ. ޒިދުނާ އިބްރާހީމް

ވަޒީފާއާބެހޭ ޓްރައިބިއުނަލުން، މެރިޓް އުޞޫލުން ބަލައި ދޫކޮށްލިކަން ސާބިތުނުކުރެވޭތީ މައުޟޫޢީ އަދި އިޖުރާއީ ޢަދުލުވެރިކަން ޤާއިމްނުކޮށް ކުރި އަންފެއަރ ޑިސްމިސަލްއެއްކަމަށް ކަނޑައަޅައި، މަޤާމަށް ރުޖޫޢަކޮށް މުސާރައާއި އިނާޔަތްތައް ދިނުމަށް ނިންމިއެވެ.

ރައީސުލްޖުމްހޫރިއްޔާގެ ނިންމެވުމަކުން ހައުސިންގ މިނިސްޓްރީ އުވާލައި، އެ މިނިސްޓްރީގެ މުވައްޒަފުން ނަން ބަދަލުކުރި ޕްލޭނިންގ މިނިސްޓްރީއަށް ބަދަލުކުރިއެވެ. އުވާލި މިނިސްޓްރީގެ އެޗް.އާރް ޑިރެކްޓަރަށް ނަން ބަދަލުކުރި މިނިސްޓްރީގެ ދެ ޑިރެކްޓަރ މަޤާމާއި އެހެން ތިން މިނިސްޓްރީއެއްގެ އެޗް.އާރް ޑިރެކްޓަރ މަޤާމު ހުށަހެޅި ނަމަވެސް ޤަބޫލުނުކުރުމުން، ސިވިލް ސަރވިސް ގަވާއިދުގެ 223(ށ) ގެ ދަށުން ވަޒީފާއިން ދޫކޮށްލިއެވެ.

ސިވިލް ސަރވިސް ކޮމިޝަނުން ބުނީ އެއްފެންވަރުގެ މަޤާމުތައް ހުށަހަޅައި ޤަބޫލުނުކުރުމުން ގަވާއިދާ އެއްގޮތަށް ދޫކޮށްލިކަމަށާއި، އުވިފައިވާ މަޤާމަކަށް ރުޖޫޢަކުރުމަށް ނިންމުމަކީ ޢަމަލުނުކުރެވޭ ނިންމުމެއްކަމަށެވެ. މުވައްޒަފުން ބުނީ ދެ މިނިސްޓްރީ އެއްކޮށްލައި އައު މިނިސްޓްރީއެއް އުފެއްދިކަމުން އެއް މަޤާމުގައި ތިބި ދެމީހުންގެ ތެރެއިން މެރިޓް އުޞޫލުން ހޮވަން ޖެހޭކަމަށެވެ.

މިނިސްޓްރީއެއް އުވާލައި، އެ މިނިސްޓްރީގެ މުވައްޒަފުން އެހެން މިނިސްޓްރީއަކަށް (ނަން ބަދަލުކުރި) ބަދަލުކުރުމުން، ހުށަހެޅި އެއްފެންވަރުގެ މަޤާމުތައް ޤަބޫލުނުކުރި މުވައްޒަފަކު ސިވިލް ސަރވިސް ގަވާއިދުގެ 223 ވަނަ މާއްދާގެ ދަށުން ވަޒީފާއިން ވަކިކުރުމަކީ މައުޟޫޢީ އަދި އިޖުރާއީ ޢަދުލުވެރިކަން ޤާއިމްނުކޮށް ކުރި ވަކިކުރުމެއްތޯ، އަދި އެ ޙާލަތުގައި މެރިޓް އުޞޫލުން މަޤާމު ކަނޑައަޅަން ޖެހޭތޯ.

ވަޒީފާއާބެހޭ ޓްރައިބިއުނަލްގެ ނިންމުމަށް ބަދަލުގެނައި (ނިންމުން ބާޠިލު)

އައު މިނިސްޓްރީއެއް ނުއުފައްދާތީ އަދި ނަން ބަދަލުކުރި މިނިސްޓްރީގެ ޑިރެކްޓަރ މަޤާމުގައި ކުރިންސުރެ މީހަކު ހުރުމުން މިއީ މެރިޓް އުޞޫލުން ބަލަންޖެހޭ ޙާލަތެއް ނޫނެވެ. އެއްފެންވަރުގެ މަޤާމުތައް ހުށަހަޅައި ޤަބޫލުނުކުރުމުން ގަވާއިދުގެ 223(އ) އާއި އުޞޫލުގެ 3(ށ) އާ އެއްގޮތަށް ދޫކޮށްލީތީ ޢަދުލުވެރިކަން ޤާއިމްކޮށްގެން ކުރި ވަކިކުރުމެކެވެ.