ސިވިލް ސަރވިސް ކޮމިޝަން ވ. އަނީގާ އިބްރާހީމް

ވަޒީފާއާބެހޭ ޓްރައިބިއުނަލުން ވަކިވުމުގެ ސިޓީއާމެދު ގޮތެއް ނުނިންމުމާއި، ވަކިވާން އެދުމަށްފަހު މަސައްކަތް ކުރުވުމާއި، މަޤާމު އުވާނުލާ ހުރުމުގެ ސަބަބުން މަޤާމަށް އަލުން ހަމަޖައްސައިދިނުމަށާއި، 2013 ގެ އެޕްރައިޒަލް ފުރައި ބޯނަސް ދިނުމަށް އަމުރުކުރިއެވެ.

ސިވިލް ސަރވިސްގެ ކޮމިއުނިޓީ ހެލްތު އޮފިސަރަކަށް ބޭރުގައި ކިޔެވުމަށް ޕޭލީވް ނުލިބުމުން 2 މާރޗް 2014 އިން ފެށިގެން ވަޒީފާއިން ވަކިކޮށްދިނުމަށް އެދި ސިޓީ ހުށަހަޅައި ކިޔަވަން ދިޔައެވެ. 2015 ގައި އެނބުރި އައިސް ސާފުކުރިއިރު ވަކިކޮށްފައި ނުވާތީ އަލުން ވަޒީފާއާ ގުޅުމަށް އެދުމުން، 7 ސެޕްޓެމްބަރު 2015 ގައި 2 މާރޗް 2014 އިން ފެށިގެން ވަކިކުރި ޗިޓު ދިނެވެ.

ދައުލަތުން ބުނީ ސިވިލް ސަރވިސްގެ ޤާނޫނުގެ 47 (ނ) (5) އާއި ވަޒީފާއާބެހޭ ޤާނޫނުގެ 29 (ހ) އަށް ރިޢާޔަތްނުކޮށް ޓްރައިބިއުނަލުން މައްސަލަ ނިންމި ކަމަށެވެ.

މުވައްޒަފު އަމިއްލައަށް ވަޒީފާއިން ވަކިވާން އެދި ސިޓީ ހުށަހަޅައި ކިޔަވަން ދިއުމަށްފަހު، ވަޒީފާދޭ ފަރާތުން އެ ސިޓީއާމެދު ގޮތެއް ނުނިންމައި ޗިޓު ލަސްކޮށް ދިނުމާއި މަޤާމު އުވާނުލާ ހުރުމުގެ ސަބަބުން، މުވައްޒަފު އެ މަޤާމަށް އަލުން ހަމަޖައްސައިދިނުމަށް ޓްރައިބިއުނަލުން އަމުރުކުރުން ސިވިލް ސަރވިސްގެ ޤާނޫނުގެ 47 (ނ) (5) އާ އެއްގޮތްތޯ.

ބައެއް ބަދަލުކުރި (މަޤާމަށް އަލުން ހަމަޖައްސައިދިނުމުގެ ބައި ބާޠިލު)

ވަކިވާން އެދުމަކީ 47 (ނ) (5) ގެ ދަށުން ވަކިކުރެވޭ ސަބަބެކެވެ. ސިޓީއާމެދު ގޮތެއް ނުނިންމުމާއި މަޤާމު އުވާނުލުމަކީ އަލުން ހަމަޖައްސައިދިނުމުގެ ޤާނޫނީ ސަބަބެއް ނޫނެވެ. ވަކިވާން އެދުމަށްފަހު އެޕްރައިޒަލް ފޯމެއް ފުރުމަކީ ޤާނޫނީ ޒިންމާއެއް ކަމުން ވަޒީފާގެ މަސްއޫލިއްޔަތު އަދާކުރުވިކަމަށް ނުބެލެވެއެވެ.