އަޙްމަދު ހަފީޡު ވ. ޕްރޮސިކިއުޓަރ ޖެނެރަލްގެ އޮފީސް

ހައިކޯޓުން ނިންމެވީ:

1. 1. ޤާނޫނު ނަންބަރު 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) އުވާލެވިފައިވީނަމަވެސް، ޤާނޫނު ނަންބަރު 4/2011 (މާނަކުރުމުގެ ހަމަތައް ބަޔާންކުރުމުގެ ޤާނޫނު) ގެ 19 ވަނަ މާއްދާ އަށް ރިޢާޔަތްކޮށް، އެ ޤާނޫނުގެ ދަށުން ހިނގާފައިވާ ތަޙްޤީޤާއި އަޅާފައިވާ ފިޔަވަޅަށް އަސަރު ނުކުރާނެކަމަށާއި، އިސްތިއުނާފްކުރާ ފަރާތުގެ މައްޗަށް އޮތް ތުހުމަތަށް ބަދަލެއް ނާންނާނެކަމަށެވެ.

2. 2. ބަންދު މުރާޖަޢާކުރުމުގައި ބަލަންޖެހޭނެ ކަންކަން ދިވެހިރާއްޖޭގެ ސުޕްރީމް ކޯޓުގެ ސުޕްރީމް ކޯޓުގެ ނަންބަރު 2024/SC-A/09 ޕްރޮސިކިއުޓަރ ޖެނެރަލް ވ. ޢިރުފާން ތަޤިއްޔު ޤަޟިއްޔާއާއި، ނަންބަރު: 2020/SC-A/93 ޝަހީބް އިބްރާހީމް ވ. ޕްރޮސިކިއުޓަރ ޖެނެރަލްގެ އޮފީސް ޤަޟިއްޔާއާއި، ނަންބަރު: 2024/SC-A/19 ޕްރޮސިކިއުޓަރ ޖެނެރަލް ވ. މުޙައްމަދު ބިޝާރު އިސްމާޢީލް ޤަޟިއްޔާގައި ކަނޑައަޅުއްވާފައިވާއިރު، އެ ޓެސްޓާ ޚިލާފަށް ޤާނޫނު ނަންބަރު: 7/2025 ގެ 58 ވަނަ މާއްދަގައިވާ ކަންކަން ވަޒަންކޮށް ބަންދުކުރުމަށް އަމުރުކުރައްވަފައިވަނީ ބަންދު މުރާޖަޢާކުރުމުގައި ބަލަންޖެހޭ ޓެސްޓާ ޚިލާފަށްކަމަށެވެ. އިސްތިއުނާފްކުރެވިފައިވާ ނިންމުމުގައި އިސްތިއުނާފްކުރާ ފަރާތް ޝަރީޢަތް ނިމެންދެން ބަންދުކުރި އަމުރު ބާޠިލްކޮށްފައި ނުވާކަމަށާއި ބަންދު ކުރި ހާލަތަށް ބަދަލެއް އައިސްފައިނުވާކަން ދަށުކޯޓުގެ ނިންމުމުގެ 7 ވަނަ ނުކުތާއަށާއި ޝަރީޢަތް ނިމެންދެން ބަންދުކުރި އަމުރަށް ބަލާއިރު އެނގޭކަމަށާއި،

3. 3. އިސްތިއުނާފުކުރާ ފަރާތުން ހަވާލާދީފައިވާ ސުޕްރީމް ކޯޓުގެ ނަންބަރު 2011/SC-A/23 ދައުލަތް ވ. ޙަސަން ޢަބްދުالله އަދި އިތުރު ފަރާތްތައް ޤަޟިއްޔާގައި ބަޔާންކުރާ އުޞޫލަކީ ޖިނާއީ މައްސަލައެއް ސާބިތުކުރުމުގައި ޢަމަލުކުރާ އުޞޫލާ ގުޅޭގޮތުން ޤާނޫނު ރަޖުޢީކޮށް ތަޠުބީޤުކުރުމާ ގުޅޭ ޤަޟިއްޔާއަކަށްވާތީ މި މައްސަލައަށް އެ ޤަޟިއްޔާގައި ކަނޑައަޅާފައިވާ އުޞޫލު ތަޠުބީޤުކުރެވޭނެ ކަމަށް ނުދެކޭކަމަށާއި،

4. 4. ނަމަވެސް އިސްތިއުނާފްކޮށްފައިވާ ނިންމުމުގައި ޤާނޫނު ނަންބަރު: 7/2025 ގެ 58 ވަނަ މާއްދާގެ ދަށުން ބަންދުކުރުމަށް އަމުރުކޮށްފައިވަނީ ބަންދު މުރާޖަޢާކުރުމުގެ އުސޫލާ ޚިލާފަށްކަމުގައިވާތީއާއި،

5. 5. މި މައްސަލާގައި އިސްތިއުނާފްކޮށްފައިވާ ދ. ބަނޑިދޫ މެޖިސްޓްރޭޓް ކޯޓުގެ ނަންބަރު: M2C/AM/2025/02  ބަންދު އަމުރު މުރާޖަޢާކޮށް ނިންމިގޮތް ބާޠިލްކަމަށް ކަނޑައަޅައި މައްސަލަ ބެއްލެވި ފަނޑިޔާރުންގެ އިއްތިފާޤުން ޙުކުމްކުރެއްވިއެވެ.