2018/HC-A/47

ސިވިލް ކޯޓުން، 750,000 ރުފިޔާއާއި ގެއްލުމުގެ ބަދަލާއި 60,000 ރުފިޔާގެ ޖުމްލައިގެ ތެރެއިން ދަޢުވާގައި އެދިފައިވާ 1,095,000 ރުފިޔާ ދައްކަން ޙުކުމްކޮށްފައިވެއެވެ.

"ވިޔަފާރި އުޞޫލުން ފައިސާ ދޫކުރުމުގެ އެގްރީމެންޓެއް" ގެ ދަށުން 750,000 ރުފިޔާ އަނބުރާ ދައްކާގޮތަށް ނަގައި، ސެކިއުރިޓީއެއްގެ ގޮތުގައި ބޯޓެއް ރަހުނުކޮށްފައިވިއިރު، ފައިސާ އަނބުރާ ނުދައްކާތީ، އެގްރީމެންޓުގައިވާ ދުވާލަކަށް 5% ގެ ގެއްލުމުގެ ބަދަލާއި ޤާނޫނީ ވަކީލަށް ދޭންޖެހޭ ފީގެ ގޮތުގައިވާ 60,000 ރުފިޔާއާއެކު ފައިސާ ހޯދުމަށް ދަޢުވާކޮށްފައިވެއެވެ.

އިސްތިއުނާފުކުރި ފަރާތުން ބުނީ އަތަށް ލިބިފައިވަނީ 300,000 ރުފިޔާކަން ހެކިބަހުން އެނގޭކަމަށާއި، ހުއްދަ ލިބިފައިވާ ޤާނޫނީ ވަކީލަކަށް ޚަރަދުކުރިކަމުގެ ހެއްކެއް ނެތި ލީގަލް ފީ ނަގައިދީފައިވާކަމަށާއި، ދައްކަންޖެހޭ ފައިސާ ދަރަނިވެރިޔާ އެދިގެން ތިންވަނަ ފަރާތަކާ ޙަވާލުކޮށްފައިވާކަމަށެވެ.

ލިޔުމުން ހަދާފައިވާ ފައިސާ ދޫކުރުމުގެ އެގްރީމެންޓެއްގައިވާ ޢަދަދު ޝަފަހީ ހެކިން ނަފީކުރެވޭނެތޯއާއި، އެގްރީމެންޓުގައި "ޤާނޫނީ ވަކީލަށް ދޭންޖެހޭ ފީ" ގެ ގޮތުގައިވާ ފައިސާ ހުއްދަ ލިބިފައިވާ ޤާނޫނީ ވަކީލަކު ލައްވާ މަސައްކަތްކުރުވިކަން ސާބިތުނުކޮށް ނަގައިދެވޭނެތޯއާއި، ތިންވަނަ ފަރާތަކަށް ދެއްކި ފައިސާއިން ދަރަނި އަދާވެފައިވޭތޯ.

ބައެއް ބަދަލުކުރި (ޤާނޫނީ ވަކީލަށް ދޭންޖެހޭ ފީގެ 60,000 ރުފިޔާ ނަގައިދިނުމަށް ކުރި ބައި ބާޠިލު، ބާކީ ބައި ޤާއިމް)

ލިޔުމުން ސާބިތުވާ ޢަދަދު ނަފީކުރާނެ ކިތާބީ ނުވަތަ ކާފީ ހެކި ހުށަހަޅާފައިނުވާތީއާއި، ތިންވަނަ ފަރާތަކަށް ދިން ފައިސާއަކީ ދަރަނި ހިފާ ފަރާތް ބުނެގެން ދިން ފައިސާކަން ސާބިތުނުވާތީ އެ ބައިތައް ޤާއިމުކޮށް، ލީގަލް ފީއަކީ ހުއްދަ ލިބިފައިވާ ޤާނޫނީ ވަކީލަކު ލައްވާ ކުރުވި މަސައްކަތަކަށްކަން ސާބިތުނުވާތީ އެ ބައި ބާޠިލުކޮށްފައިވެއެވެ.