2017/HC-A/323

މެޖިސްޓްރޭޓް ކޯޓުން، 15 ދުވަހަށް ގޭގައި ބަންދުކުރުމަށް ކަނޑައަޅައި، ހެކިންނަށް ނުފޫޒު ފޯރުވާނަމަ ބަންދާމެދު އަލުން މުރާޖަޢާކުރުމަށް ކޯޓަށް ހުށަހެޅުމަށް އެންގިއެވެ.

ކުޑަކުއްޖަކާމެދު ގުރޫޕްހަދައިގެން ބަދުއަޚްލާޤީ ޢަމަލު ހިންގިކަމަށް ތުހުމަތުކުރެވޭ މީހަކު ޖަލުގައި ބަންދުކުރުމަށް ފުލުހުން އެދުނީ މުޖްތަމަޢުގެ ސަލާމަތަށް ނުރައްކާވެދާނެތީއާއި ހެކިންނަށް ނުފޫޒު ފޯރުވާފާނެތީއެވެ. ތަޙްޤީޤު ނިންމައި މައްސަލަ ޕްރޮސިކިއުޓަރ ޖެނެރަލްގެ އޮފީހަށް ފޮނުވާނެކަމަށް ދައުލަތުން ބުންޏެވެ.

ޕްރޮސިކިއުޓަރ ޖެނެރަލް ބުނީ އަމުރަކީ ޤާނޫނުއަސާސީގެ 49 ވަނަ މާއްދާއާއި ބަންދާމެދު ގޮތެއް ނިންމުމުގެ ޤަވާޢިދުގެ 7 ވަނަ މާއްދާއާއި ޤާނޫނުއަސާސީގެ 143(ރ) އާ ޚިލާފަށް ނެރުނު އަމުރެއް ކަމަށެވެ.

ކުޑަކުއްޖަކު ޖިންސީ ޢަމަލެއްގައި ބައިވެރިކުރުވުމުގެ ތުހުމަތުގައި ހުރި މީހަކު ޖަލުގައި ނޫނީ ގޭގައި ބަންދުކުރުމަށް މެޖިސްޓްރޭޓް ކޯޓުން ނެރުނު އަމުރަކީ ޤާނޫނުއަސާސީގެ 49 ވަނަ މާއްދާއާއި 143(ރ) އާއި ބަންދާމެދު ގޮތެއް ނިންމުމުގެ ޤަވާޢިދާ ޚިލާފު އަމުރެއްތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

ބަންދާމެދު ގޮތެއް ނިންމުމުގެ ބާރު ލިބިދީފައިވަނީ ފަނޑިޔާރަށް ކަމަށާއި، ހެކިތަކާއި ކަންހިނގާފައިވާ ގޮތާއި ވަށައިގެންވާ ކަންކަމަށް ބަލާއިރު ގޭބަންދުގެ އަމުރަކީ ޤާނޫނުއަސާސީއާއި ޤަވާޢިދާ ޚިލާފު އަމުރެއް ކަމުގައި ނުބެލެވޭތީ، އަމުރަށް ބަދަލުގެނައުމުގެ ސަބަބެއް ނެތްކަމަށް ނިންމިއެވެ.