2016/HC-A/54

ކްރިމިނަލް ކޯޓުން މަސްތުވާތަކެއްޗާބެހޭ ޤާނޫނުގެ 106 ވަނަ މާއްދާގެ (ހ) ގެ ދަށުން ކެނަބިސް ޓްރެފިކްކުރުމުގެ ކުށް ސާބިތުކޮށް، (ނ) ގެ ދަށުން އުމުރަށް ޖަލަށްލުމާއެކު 100,000 ރުފިޔާގެ ޖޫރިމަނާއަށް ޙުކުމްކުރި.

މާލެއިން ހއ. އިހަވަންދޫއަށް ދިޔަ ދޯންޏަކުން މަސްތުވާތަކެތި ގެންދާ މަޢުލޫމާތަކާ ގުޅިގެން، ދޯނިން ފޭބުމުން ތުހުމަތުކުރެވޭ ފަރާތް ފުލުހުންގެ ބެލުމުގެ ދަށަށް ގެނެސް ޕޮލިސް ސްޓޭޝަނަށް ގެންދިޔައިރު، އަތުގައިވާ ތަކެތި ނެގުމަށް އެންގުމުން ސޯޓުގެ ޖީބުން ނެގި ފިލްމު ހުސްކުރި ދަޅުގައި 23.7912 ގްރާމް ކެނަބިސް ހުރިކަން ތަޙުލީލުން ދެއްކިއެވެ.

އިސްތިއުނާފުކުރި ފަރާތުން ބުނީ، ދޯނިން ފޭބިއިރު ނުފެނި ޕޮލިސް ސްޓޭޝަނުގައި ޖީބުން ފެނުނު ތަކެތި އޭނާގެކަން ޔަޤީން ނުކޮށް ޙުކުމްކުރުމަކީ ޤާނޫނުއަސާސީގެ 51(އ) އާ ޚިލާފު ކަމަށާއި، ބަލައި ފާސްކުރީ ފުލުހުންގެ ބާރުތަކުގެ ޤަވާޢިދާ ޚިލާފަށް ކަމަށެވެ.

ތުހުމަތުކުރެވޭ ފަރާތް ފުލުހުންގެ ބެލުމުގެ ދަށަށް ގެންދިޔަ ވަގުތު ނުފެނި، ޕޮލިސް ސްޓޭޝަނުގައި ޖީބުން ފެނުނު މަސްތުވާތަކެއްޗަށް ބިނާކޮށް ކެނަބިސް ޓްރެފިކްކުރުމުގެ ކުށް ސާބިތުކުރުމަކީ ޤާނޫނުއަސާސީގެ 51 ވަނަ މާއްދާގެ (އ) ގައިވާ އެކަށީގެންވާ ޝައްކެއްނެތި ސާބިތުކުރުމުގެ މިންގަނޑާ ޚިލާފު ކަމެއްތޯ.

އިސްތިއުނާފު ބާޠިލު، ދަށުކޯޓުގެ ޙުކުމް ޤާއިމް

ފުލުހުންގެ ހެކިބަހުން، ސްޓޭޝަނުގައި ބަލައި ފާސްކުރުމުގެ ކުރިން ޖީބުން ދަޅު ނެގިކަމާއި އެއީ އޭނާގެ އެއްޗެއްކަމަށް ބުނިކަން، އަދި ތަޙުލީލު ރިޕޯޓާއި ތަޙުލީލުކުރި ފަރާތުގެ ހެކިބަހުން ކެނަބިސްކަން އެނގޭތީ، އަދި އިސްތިއުނާފުގައި ފާހަގަކުރި އިޖުރާއީ ކަންކަން ދަށު ކޯޓުގައި ފާހަގަ ނުކޮށް ފުށުއަރާތީ، ދަޢުވާ އެކަށީގެންވާ ޝައްކެއްނެތި ސާބިތުވާ ކަމަށް ނިންމިއެވެ.