2016/HC-A/453

ސިވިލް ކޯޓުން، 25 މަހުގެ ކުލީގެ ގޮތުގައި 375,000 ރުފިޔާއާއި ގެއްލުމުގެ ބަދަލުގެ ގޮތުގައި ކުލީގެ 15 އިންސައްތަ (56,250 ރުފިޔާ) ދައްކަންޖެހޭކަމަށާއި، އެއްބަސްވުން ބާޠިލްކަމަށް ކަނޑައެޅިއެވެ.

ހ. ހުޅުލޭގެ ފަސްޓް ފްލޯ ކުއްޔަށް ދިނުމަށް 17 މާރިޗު 2012 ގައި ވެފައިވާ އެއްބަސްވުމުގެ ދަށުން މަހަކު 15,000 ރުފިޔާގެ ކުލި ދައްކަންޖެހޭއިރު، ކުލި ނުދައްކާތީ އެއްބަސްވުން ބާޠިލުކޮށް، ޙައްޤުތަކާއި ގެއްލުމުގެ ބަދަލު ހޯދުމަށް ކުލިދޭ ފަރާތުން ދަޢުވާކުރިއެވެ. ކުލި ހިފި ފަރާތުން ކުލި ދައްކާފައިވާކަމަށް ބުނެ ދެ ޕޭމަންޓް ވައުޗަރެއް ހުށަހެޅިއެވެ.

އިސްތިއުނާފުކުރި ފަރާތުން ބުނީ، ކުލި ދައްކާފައިވާކަމުގެ ލިޔުންތަކާއި ދެފަރާތުގެ ވާހަކަތަކަށް ދަށުކޯޓުން ރިޢާޔަތް ނުކުރާކަމަށާއި، އެއްބަސްވުމުގައި ބަޔާންކޮށްފައިނުވާ ގެއްލުމުގެ ބަދަލު ނަގައިނުދެވޭނެކަމަށެވެ. ދަޢުވާކުރި ފަރާތުން ބުނީ ވައުޗަރުތަކަކީ ސައްޙަ ވައުޗަރުތަކެއް ނޫންކަމަށާއި، ފައިސާ ލިބުނުނަމަ ރަސީދު ދޫކުރާނެކަމަށެވެ.

ކުއްޔަށް ދިނުމުގެ އެއްބަސްވުމުގެ ދަށުން ކުލި ދައްކާފައިވާކަން ސާބިތުކުރުމަށް ހުށަހެޅި ޕޭމަންޓް ވައުޗަރުތައް ދަށުކޯޓުން ބަލައިނުގަތުމަކީ ހެކި ވަޒަންކުރުމުގައި ކުށެއް ކުރެވިފައިވާ ކަމެއްތޯ؛ އަދި ގެއްލުމުގެ ތަފްސީލު ހުށަނާޅާ، ހަމައެކަނި ކުލި ނުދެއްކުމުގެ ސަބަބުން ގެއްލުމުގެ ބަދަލު ނަގައިދެވޭތޯ.

ބައެއް ބަދަލުކުރި؛ ގެއްލުމުގެ ބަދަލު ނަގައިދިނުމަށް ކަނޑައެޅި ބައި ބާޠިލު، ބާކީ ޙުކުމް ޤާއިމް

ވައުޗަރުތަކުގެ ސޮޔާއި އަތުލިޔުން ފާޅުކޮށް ތަފާތުކަމާއި ރަސީދެއް ނުވަތަ އެހެން ހެއްކެއް ނެތުމުން، ކުލި ދައްކަންޖެހޭ ކަމަށް ކަނޑައެޅުމުގައި ކުށެއް ނުވެއެވެ. ނަމަވެސް ގެއްލުން ހިސާބުކުރި ގޮތުގެ ތަފްސީލު ހުށަނާޅާ، އަދި ކޮންޓްރެކްޓާބެހޭ ޤާނޫނުގެ 23 ވަނަ މާއްދާގައިވާ ބާވަތުގެ ގެއްލުމެއްކަން ނުދައްކާ ގެއްލުމުގެ ބަދަލު ކަނޑައަޅާފައިވާތީ އެބައި ބާޠިލުކުރެވުނެވެ.