2016/HC-A/374

ސިވިލް ކޯޓުން، ކުންފުންޏަށް ގެއްލުންވާގޮތަށް މެޖޯރިޓީ ޙިއްޞާދާރުން ޢަމަލުކޮށްފައިވާކަން ސާބިތުނުވާތީ، ދަޢުވާގައި އެދިފައިވާ ފަދައިން ފައިޞަލާކޮށްދެވެން ނެތްކަމަށް ޙުކުމްކުރިއެވެ.

ތިން ޙިއްޞާދާރުން ތިބި ކުންފުންޏެއްގެ މައިނޯރިޓީ ޙިއްޞާދާރު، މެޖޯރިޓީ ޙިއްޞާދާރުންގެ ޢަމަލުތަކުގެ ސަބަބުން ކުންފުނި ދަރަނިވެރިވެ ކުންފުނީގެ ހަމައެކަނި އެސެޓް ކަމުގައިވާ ރިސޯޓު ގެއްލިދާނެ ކަމަށް ބުނެ، ކުންފުނީގެ މުދާ އަގުކޮށް ދަރަނި ހިސާބުކޮށް، ދަރަނިއަށް އޭނާ ޖާމިނުވުމުން ކުއްޔަށް ދިނުމުގެ އެއްބަސްވުމުގެ ޙައްޤުތައް އޭނާއަށް ލިބިދިނުމަށް އެދި ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، އިދާރީ އިހުމާލުން ނިންމުމުގެ ބާރު ނަފީނުވާކަމަށް ބުރަވުމާއި، މެޖޯރިޓީގެ ނިންމުންތައް ވިޔަފާރީގެ ނިންމުންކަމަށް ބަލައި ހެކި ނުބެލުމާއި، ހެކިން ޙާޟިރުނުކުރުމާއި، ޙުކުމް އިޞްލާޙުކުރުމަކީ ހެކި ބެލުމުގެ އުޞޫލުތަކާއި ކުންފުނީގެ ޤާނޫނުގެ 73، 74 ވަނަ މާއްދާތަކާއި ޤާނޫނުއަސާސީގެ 42 ވަނަ މާއްދާއާ ޚިލާފު ކަމަށެވެ.

ކުންފުނީގެ މެޖޯރިޓީ ޙިއްޞާދާރުން ކުންފުންޏަށް ގެއްލުންވާގޮތަށް ޢަމަލުކޮށްފައިވޭތޯއާއި، ޑިރެކްޓަރަކަށް ނޯޓިސް ނުފޮނުވާ ބޭއްވި ބޯޑު ބައްދަލުވުމެއްގައި ނަގަން ނިންމި ލޯނެއް ބާޠިލުވޭތޯއާއި، ކުންފުނީގެ ވިޔަފާރި ނިންމުންތަކުގައި މައިނޯރިޓީ ޙިއްޞާދާރަކަށް ޝަރީޢަތުން ރިލީފު ދެވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ލޯނު ނެގުމުގެ ބައްދަލުވުމަށް ނޯޓިސް ނުފޮނުވުމަކީ އިދާރީ އިހުމާލެއް ކަމުގައިވިއަސް، މައިނޯރިޓީ ޙިއްޞާދާރަށް މެޖޯރިޓީގެ ނިންމުން ބަދަލުކުރުމުގެ ބާރު ނެތުމާއި، އެ ދުވަސްވަރު އިޢުތިރާޟު ނުކުރުމާއި، ތިންވަނަ ފަރާތްތަކުގެ ޙައްޤު ހިމެނުމުން ނިންމުން ބަދަލުކުރަން ނުޖެހެއެވެ. ލޯނުގެ ފައިސާ ހޭދަކުރީ ކުންފުނީގެ ޤަވާޢިދާ އެއްގޮތަށް އެސެޓް އިތުރުކުރުމަށް ކަމުން، މެޖޯރިޓީގެ ޢަމަލުތަކުން ކުންފުނި ދަރަނިވެރިވިކަމަށް ނުބެލެވެއެވެ.