2015/HC-A/41

ގޯތީގެ ބައެއް ވިއްކުމުން ބެލުން ޝަރުޠުކުރުމުގެ އެއްބަސްވުމަށް ޢަމަލުނުކުރުމަށް ދެފަރާތުން ނިންމިކަމަށް ބަލަންޖެހޭތީ، އެއީ ޢަމަލުކުރެވެން ނެތް ބާޠިލް އެއްބަސްވުމެއްކަމަށް ކަނޑައަޅައި، ތަންފީޛުކޮށްދެވޭނެ ތަނެއް ނެތްކަމަށް ސިވިލް ކޯޓުން ޙުކުމްކުރިއެވެ.

ބެލެވުނު ފަރާތުގެ މަރުދުވަހާ ހަމައަށް ބެލުން ޝަރުޠުކޮށް ގޯތީގެ ޢިމާރާތްތަކުގެ 3/2 އިސްތިއުނާފުކުރި ފަރާތަށް ދިނުމަށް 1995 ގައި އެއްބަސްވެ ރަޖިސްޓްރީކުރިއެވެ. ފަހުން ގޯތި ބަހައި، ޢިމާރާތްތަކުގެ 2/1 އިސްތިއުނާފުކުރި ފަރާތަށް 2012 ގައި ވިއްކިއެވެ. ބެލެވުނު ފަރާތް ނިޔާވުމުން، ބެލުން ޝަރުޠުކުރުމުގެ އެއްބަސްވުން ތަންފީޛުކޮށްދިނުމަށް އެދި ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، ރަޖިސްޓްރީކޮށް ޢަމަލުކުރެވިފައިވާ ބެލުން ޝަރުޠުކުރުމުގެ އެއްބަސްވުމަކީ ތަންފީޛުކުރެވޭނެ އެއްބަސްވުމެއްކަމަށާއި، ސާބިތުނުވާ ވާޤިޢާއެއް އިސްތިޙްލާޞްކޮށްފައިވާކަމަށާއި، ކޮންޓްރެކްޓާބެހޭ ޤާނޫނުގެ 21 ވަނަ މާއްދާއާ ޚިލާފުކަމަށާއި، ވާރިޘުން ނޫން ފަރާތްތައް ޝަރީޢަތަށް ހާޟިރުކުރިކަމަށެވެ.

ބެލުން ޝަރުޠުކޮށް ގޯތީގެ ބައެއް ދިނުމަށް ރަޖިސްޓްރީކޮށްފައިވާ އެއްބަސްވުމެއްގެ ފަހުން، ހަމަ އެ ދެފަރާތުގެ މެދުގައި ގޯތީގެ ބައެއް ވިއްކުމުން، ބެލުން ޝަރުޠުކުރުމުގެ އެއްބަސްވުމަށް ޢަމަލުކުރެވެން ނެތި ބާޠިލުވޭތޯ؛ އަދި ބެލެވުނު ފަރާތުގެ ގާތް ތިމާގެ މީހުންގެ ބަސް ހޯދުމަކީ އިޖުރާއީ ގޮތުން ކުށެއްތޯ.

ދަށުކޯޓުގެ ޙުކުމް ބާޠިލު، އަލުން ބެލުމަށް ފޮނުވި

ބެލުން ޝަރުޠުކުރުމާއި ވިއްކުމަކީ ވަކި ވަކިން ތަންފީޛުކުރެވޭ ދެ މުޢާމަލާތެއް ކަމުންނާއި، ބެލެވުނު ފަރާތުން އެއްބަސްވުން ރޫޅާލަން މަސައްކަތްކޮށްފައިނުވާތީ، އެއްބަސްވުން ބާޠިލުވެފައިވާކަމަށް ބެލޭނެ ހަމައެއް ނެތެވެ. އިސްތިއުނާފުކުރި ފަރާތުން އެއްބަސްވުމާ އެއްގޮތަށް ޢަމަލުކޮށްފައިވޭތޯ ބެލުމަށް މައްސަލަ ސިވިލް ކޯޓަށް ތަޙްވީލުކުރިއެވެ.