2015/HC-A/361

ސިވިލް ކޯޓުން ޚިދުމަތުގެ އަގުގެ ގޮތުގައި ދަޢުވާގައި ކުރިން އެދުނު ޢަދަދު ދައްކަން ޙުކުމްކޮށް، ތަޙްވީލުކުރި މައުޟޫޢުގައި ވަކީލު ފީ ނުހިމެނޭތީ ވަކީލު ފީ ނަގައި ނުދިނެވެ.

ރެސްޓޯރެންޓުން އިސްތިއުނާފުކުރި ފަރާތުން ފޮނުވި މީހުންނަށް ކްރެޑިޓަށް ކާންދީފައިވާ ފައިސާ ހޯދުމަށް ކުރި ދަޢުވާއެކެވެ. ކުރިން ހައިކޯޓުގެ 2010/HC-A/91 އިން ފައިސާގެ މިންވަރު ކަނޑައެޅުމަށް ސިވިލް ކޯޓަށް ތަޙްވީލުކުރުމަށްފަހު ދެ ފަހަރު ދަޢުވާ ފޯމް ބާޠިލުވެ، ތިންވަނަ ފަހަރަށް ހުށަހެޅުނެވެ.

އިސްތިއުނާފުކުރި ފަރާތުން ބުނީ ކޯޓުތަކުގެ ޤާނޫނުގެ ތަޙްވީލާބެހޭ މާއްދާއާއި ތަޙްވީލުވާ މައްސަލަތަކުގެ ގަވާއިދާ ޚިލާފަށް މައްސަލަ ބެލި ކަމަށާއި، ދަޢުވާކުރި ފަރާތުން ހުށަހެޅި ލިޔުންތަކަށް ނޫން ލިޔުންތަކަށް ރިޢާޔަތްކުރި ކަމަށާއި، ބިލްތަކަށް އިންކާރުކުރާ ކަމަށެވެ.

ހައިކޯޓުން ތަޙްވީލުކުރި މައްސަލައެއްގައި ދަށު ކޯޓުން ދަޢުވާ ފޯމް ދެފަހަރު ބާޠިލުކުރުމަށްފަހު، ތިންވަނަ ފަހަރަށް ހުށަހެޅުމުން މައުޟޫޢީ ގޮތުން ބަލައި ޙުކުމްކުރުމަކީ ކޯޓުތަކުގެ ޤާނޫނާ ޚިލާފު ކަމެއްތޯއާއި، އެމައްސަލައިގައި ކުރީގެ ޤަޟިއްޔާތަކުގެ ލިޔުންތަކަށް ރިޢާޔަތްކުރެވޭނެތޯއާއި، ބިލްތަކުގެ މައްޗަށް ދަރަނި ސާބިތުވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހައިކޯޓަށް ފެނުނީ ކުރީގެ ބާޠިލުކުރުންތައް މައުޟޫޢީ ގޮތުން ބެލުމަށްފަހު ނޫންކަމުން ތިންވަނަ ފަހަރަށް މައުޟޫޢީ ގޮތުން ބެލުމަކީ ޤާނޫނާ ޚިލާފު ކަމެއް ނޫންކަމާއި، ކުރީގެ ޤަޟިއްޔާތަކުގެ ލިޔުންތަކަށް ރިޢާޔަތްކުރެވޭނެކަމާއި، ފޮނުވި ފަރާތުގެ މީހާ ސޮއިކުރި ބިލްތަކުން ދަރަނި ސާބިތުވާކަމެވެ.