2015/HC-A/320

ޓެކްސް އެޕީލް ޓްރައިބިއުނަލުން މައްސަލަ ހުށަހެޅުމާއި އަޑުއެހުން ބާއްވާ ނިންމުމަކީ ތަފާތު ދެ މަރުޙަލާ ކަމަށް ބުނެ، ހުށަހެޅުމަށްފަހު ޖޫރިމަނާ ދެއްކުމުން މައްސަލަ ކުރިއަށް ގެންގޮސް، މާކެޓް ރޭޓް ކަނޑައެޅުމުގައި އިޖްރާއަތު ފުރިހަމަނުކުރާތީ އެޑިޝަނަލް ޓީ-ޖީއެސްޓީއާއި ޖޫރިމަނާ އަނބުރާ ދިނުމަށް (3 މެންބަރުންގެ އަޣުލަބިއްޔަތުން) ނިންމިއެވެ.

އޮޑިޓަށްފަހު ރިސޯޓެއް ހިންގާ ކުންފުންޏަށް އެޑިޝަނަލް ޓީ-ޖީއެސްޓީ ދެއްކުމަށް މީރާއިން އެސެސްމަންޓް ނޯޓިސް ފޮނުވައި، އޮބްޖެކްޝަން ރިވިއު ރިޕޯޓުގައި އެ ޢަދަދު ޤާއިމްކުރިއެވެ. ކުންފުނިން ޓެކްސް އެޕީލް ޓްރައިބިއުނަލަށް މައްސަލަ ހުށަހެޅިއިރު ޓީ-ޖީއެސްޓީގެ ޖޫރިމަނާ ދައްކާފައި ނުވެއެވެ.

މީރާއިން ބުނީ ޓްރައިބިއުނަލުން ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 44 ވަނަ މާއްދާ މާނަކުރީ ރަނގަޅަށް ނޫންކަމަށާއި، 30 ދުވަހުގެ ފަހުން ފައިސާ ދެއްކުމުން މައްސަލަ ކުރިއަށް ގެންދިޔައީ އެމާއްދާއާ ޚިލާފަށް ކަމަށާއި، ޤާނޫނުއަސާސީގެ 42 ވަނަ މާއްދާއަށް ރިޢާޔަތްކޮށް މާނަ ފުޅާކުރި ކަމަށާއި، މައުޟޫޢީ ގޮތުން މާކެޓް ރޭޓާއި ޓީ-ޖީއެސްޓީ ޤާނޫނާއި ޤަވާޢިދުގެ މާއްދާތައް މާނަކުރީ ރަނގަޅަށް ނޫންކަމަށެވެ.

ޓެކްސް ނެގުމާބެހޭ އިދާރީ ޤާނޫނުގެ 44 ވަނަ މާއްދާގައިވާ ގޮތަށް މީރާއިން ކަނޑައެޅި ޢަދަދާއި އެހިނދަށް ދައްކަންޖެހޭ ފައިސާ ނުދައްކައި ޓެކްސް އެޕީލް ޓްރައިބިއުނަލަށް ހުށަހެޅި އިސްތިއުނާފެއް ޓްރައިބިއުނަލަށް ބަލައިގަނެ ކުރިއަށް ގެންދެވޭތޯ.

ޓްރައިބިއުނަލުން މައްސަލަ ބަލައިގަތުމާއި ނިންމި ނިންމުން ބާޠިލު

ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 44 ވަނަ މާއްދާގެ ދަށުން އިސްތިއުނާފުގެ ޙައްޤު އުފަންވަނީ ކަނޑައެޅުނު ޢަދަދާއި އެހިނދަށް ދައްކަންޖެހޭ ފައިސާ ދެއްކުމަށްފަހު ކަމުން، ރަޖިސްޓްރީކުރިއިރު 44 (3) ފުރިހަމަނުކޮށް ބަލައިގަތް މައްސަލައަކީ ޙައްޤު އުފަން ނުވަނީސް ބަލައިގަތް މައްސަލައެއް ކަމަށް ކަނޑައެޅިއެވެ. މައުޟޫޢީ ނުކުތާތަކަށް ހައިކޯޓުން ނުބަލައެވެ.