2013/HC-A/298

ޓެކްސް އެޕީލް ޓްރައިބިއުނަލުން އަޣްލަބިއްޔަތުން، އެ މުޢާމަލާތަކީ ޤާނޫނު ނަންބަރު 2010/19 ގެ ދަށުން ޓެކްސް ދައްކަންޖެހޭ މުޢާމަލާތެއް ނޫންކަމަށް ކަނޑައަޅައި، ނަގާފައިވާ ފައިސާ 30 ދުވަހުގެ ތެރޭގައި އަނބުރާ ދިނުމަށް މީރާއަށް އެންގިއެވެ.

ސޮނެވާ ފުށީގައި ވޯޓާ ވިލާއެއް 35 އަހަރަށް ވިއްކި މުޢާމަލާތަކީ ޤާނޫނު ނަންބަރު 2010/19 ގެ ދަށުން ޓެކްސް ދައްކަންޖެހޭ މުޢާމަލާތެއް ކަމަށް ބުނެ މީރާއިން އެސެސްމަންޓް ފޮނުވުމުން، ކުންފުނިން އިޢުތިރާޒުކޮށް، 31 ޖުލައި 2012 ގައި މީރާއިން އޮބްޖެކްޝަން ރިވިއު ރިޕޯޓް ނިންމިއެވެ. އެ ނިންމުން ޓްރައިބިއުނަލަށް އިސްތިއުނާފު ނުކުރުމުން މީރާއިން ބޭންކް އެކައުންޓްތައް ފްރީޒްކޮށް ޓެކްސާއި ޖޫރިމަނާ ކަނޑާލިއެވެ.

މީރާއިން 7 ނުކުތާ ހުށަހަޅައި، އިސްތިއުނާފުކުރުމުގެ ޙައްޤު ކުންފުންޏަށް ގެއްލިފައިވާކަމަށް ޓްރައިބިއުނަލުން ފާހަގަކުރިނަމަވެސް އެކަމަށް ރިޢާޔަތް ނުކުރުމާއި، 'ޓޫރިސްޓް' ގެ މާނަކުރުމާއި ސްޓްރާޓާ އުޞޫލުން ދޫކުރުމުގެ ޒާތަށް ނުބެލުމާއި، ފައިސާ އަނބުރާ ދިނުމަށް އެންގުމަކީ ޓްރައިބިއުނަލުގެ ބާރުގެ ބޭރުން ކަމެއް ކަމަށް ބުންޏެވެ.

ޓެކްސް ނެގުމާބެހޭ އިދާރީ ޤާނޫނުގެ 44 ވަނަ މާއްދާގައިވާ 30 ދުވަހުގެ މުއްދަތުގައި ޓެކްސް އެޕީލް ޓްރައިބިއުނަލަށް އިސްތިއުނާފު ނުކުރާ މީރާގެ އިޢުތިރާޒު ބެލުމުގެ ނިންމުމަކާމެދު، ފަހުން ބޭންކް އެކައުންޓް ފްރީޒްކޮށް ޓެކްސް ނެގުމުން ހުށަހަޅާ މައްސަލައެއްގައި ޓްރައިބިއުނަލުން މައުޟޫޢީގޮތުން ބަޙުޘްކޮށް އެ ނިންމުމަށް ބަދަލު ގެނެވޭތޯ.

ޓެކްސް އެޕީލް ޓްރައިބިއުނަލްގެ ނިންމުން ބާޠިލު

މީރާގެ އޮބްޖެކްޝަން ރިވިއު ނިންމުން ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) ގެ 44 ވަނަ މާއްދާގެ 30 ދުވަހުގެ ތެރޭގައި އިސްތިއުނާފު ނުކުރުމުން އެއީ ބަނދެވިގެންދާ ނިހާއީ ނިންމުމަކަށް ވެފައިވާތީ، ފަހުން ހުށަހެޅި މައްސަލައެއްގައި އެ ނިންމުމަށް މައުޟޫޢީގޮތުން ބަދަލު ގެނައުމަކީ ބާޠިލު ނިންމުމެއް ކަމަށް ކޯޓުން ކަނޑައެޅިއެވެ. ކޯޓުން މައުޟޫޢީ ނުކުތާތަކަށް ވަކިވަކިން ގޮތެއް ނުނިންމައެވެ.