2015/HC-A-2-04

ބަލާ ފަރާތުން އެގްރިމަންޓާ އެއްގޮތަށް ކުރަންޖެހޭ ކަންތައްތައް ނުކޮށްކަން ސާބިތުވާކަމަށް ސިވިލް ކޯޓުން (37/Cv-C/2010) ކަނޑައެޅިއެވެ. އަދި މުދަލުގެ ޙައްޤުވެރިންނަކީ ވާރިޘުންކަމަށް ކަނޑައަޅައި ޙުކުމްކުރިއެވެ. 2012/HC-A/307 ގައި ހައިކޯޓުން އެ ޙުކުމް ބާޠިލުކުރިއެވެ. ނަމަވެސް ސުޕްރީމްކޯޓުން (2014/SC-A/22) ހައިކޯޓުގެ ޙުކުމް ބާޠިލުކޮށް، މައްސަލަ އަލުން ބެލުމަށް ހައިކޯޓަށް ތަޙްވީލުކުރިއެވެ.

1979 ވަނަ އަހަރު ވެވުނު އެގްރިމަންޓެއްގެ ދަށުން، ބެލުން ޝަރުޠުކޮށް ގޯތީގެ ޢިމާރާތްތައް އިސްތިއުނާފުކުރި ފަރާތަށް ދީފައިވިއެވެ. ބެލުން ޝަރުޠުކޮށްދިން ފަރާތް އެކި ފަހަރުމަތިން އެގްރިމަންޓް ބާޠިލުކުރަން ދަޢުވާކުރި ނަމަވެސް، ބަލާ ފަރާތް ލައްވާ ބެލުމަށް ނޭދުމަކީ ބާޠިލްކުރެވޭނެ ސަބަބެއް ނޫންކަމަށް ކޯޓުތަކުން ނިންމިއެވެ. 2007 ވަނަ އަހަރު އޭނާ ކަނޑަށް ވެއްޓި ގެއްލިގެން މަރުވިއެވެ. އަދި ބަލާ ފަރާތް ބަލާފައިވާކަމަށް ކަނޑައަޅައިދިނުމަށް އެދި ދަޢުވާކުރީ ބަލާ ފަރާތެވެ.

ސިވިލް ކޯޓުގެ ޙުކުމަކީ ޝަރުޢީ އަދި ޤާނޫނީ އުޞޫލުތަކާ ޚިލާފު ޙުކުމެއްކަމަށް ބަލާ ފަރާތުން ބުނެއެވެ. ވާރިޘުންގެ ޙުއްޖަތަކީ ސިވިލް ކޯޓުގެ ޙުކުމް ޤާއިމުކުރަން ޖެހޭނެ ކަމެވެ. ކޮންމެ ފަރާތަކުން ދެއްކި ވާހަކައިގެ ތަފްޞީލު ޚުލާޞާގައި ވަކިން ބަޔާންކޮށްފައެއް ނުވެއެވެ.

ބެލުން ޝަރުޠުކޮށް މުދާ ދިނުމުގެ އެގްރިމަންޓާ އެއްގޮތަށް ބަލާ ފަރާތް، ބެލުން ޝަރުޠުކޮށްދިން ފަރާތް ގެއްލި މަރުވުމާ ހަމައަށް ބަލާފައިވޭތޯ؛ ބަލާ ފަރާތް ޝަރުޠު ފުރިހަމަ ނުކުރާކަމަށް ސިވިލް ކޯޓުން ކަނޑައަޅައި މުދަލުގެ ޙައްޤުވެރިންނަކީ ވާރިޘުންކަމަށް ކުރި ޙުކުމް ޝަރުޢީ އަދި ޤާނޫނީ އުޞޫލުތަކާ އެއްގޮތްތޯ (ސުޕްރީމްކޯޓުން އަލުން ބެލުމަށް ތަޙްވީލުކުރި މައްސަލައެއް).

ސިވިލް ކޯޓުގެ ޙުކުމް ބާޠިލު

ކުރީގެ ޤަޟިއްޔާތަކުގައި، ބަލާ ފަރާތް ލައްވާ ބެލުމަށް ނޭދުމަކީ އެގްރިމަންޓް ބާޠިލުކުރެވޭނެ ސަބަބެއް ނޫންކަމަށް ކަނޑައެޅިއެވެ. އެ ޤަޟިއްޔާތަކެއް ބާޠިލްކޮށްފައެއް ނުވެއެވެ. އެއަށްފަހު ޙާލަތަށް ބަދަލެއްވެސް އައިސްފައެއް ނުވެއެވެ. ބަލާ ފަރާތުން ފައިސާ ފޮނުވައި، ބެލުމަށް މަސައްކަތްކުރިއެވެ. ވަޅުލުން ނުކުރެވުނީ ހީނުކުރާ ފަދަ ގުދުރަތީ ނޫން މަރެއް ދިމާވުމުންނެވެ. މި ސަބަބުތަކުން، ބަލާ ފަރާތް އެގްރިމަންޓާ އެއްގޮތަށް ބަލާފައިވާކަމަށް ކޯޓަށް ޤަބޫލުކުރެވުނެވެ.