2015/HC-A/21

ސިވިލް ކޯޓުން ކަނޑައެޅީ ވަކިކުރުމުގައި އެއްބަސްވުމުގެ އިޖުރާއާތު ފުރިހަމަކުރިކަން ކުންފުނިން ސާބިތުނުކުރާކަމަށާއި، 15 ދުވަހުގެ ތެރޭގައި ޙާޟިރީގެ ކޮޕީ ދީ، ޙަޤީޤަތާ ޚިލާފު ވާހަކަތައް އުނިކޮށް ލިޔުންތައް އިޞްލާޙުކޮށް، ވަކިވާ މީހުންނަށް ދޭ ލިޔުންތައް 1 މަހުގެ ތެރޭގައި ދިނުމަށެވެ.

ޕައިލެޓެއްގެ ގޮތުގައި ވަޒީފާ އަދާކުރަމުން ދިޔަ މުވައްޒަފު، މަސައްކަތަށާއި ޙާޟިރީއަށް ފަރުވާކުޑަކުރާކަމަށާއި އިންޒާރު ދިނުމުންވެސް އިޞްލާޙުނުވާކަމަށް ބުނެ ކުންފުނިން ކުއްލިގޮތެއްގައި ވަކިކުރިއެވެ. މުވައްޒަފު ދަޢުވާކުރީ އިންޒާރާއި ނޯޓިސްގެ ލިޔުންތަކާއި ޙާޟިރީގެ ކޮޕީ ހޯދައި، ރެކޯޑުގައި ލިޔެފައިވާ ޙަޤީޤަތާ ޚިލާފު ވާހަކަތައް އިޞްލާޙުކުރުމަށެވެ.

ކުންފުނިން ބުނީ ދަޢުވާގައި ނޭދޭ ކަންކަމުގެ މައްޗަށް ނިންމިކަމަށާއި، ޙަޤީޤަތްތަކަށް ރިޢާޔަތްނުކުރާކަމަށާއި، ކުންފުންޏަކަށް ސަރުކާރުގެ އުޞޫލުތައް ލާޒިމްކޮށްފިކަމަށާއި، ވަޒީފާއާބެހޭ ޤަވާޢިދުގައި ލާޒިމްނުކުރާ ކަމެއް ނުކުރުމަކީ އިޖުރާއާތު ފުރިހަމަނުކުރުމެއް ނޫންކަމަށެވެ.

ވަޒީފާއިން ވަކިކުރި ސަބަބުތައް ސާބިތުކުރުމުގެ ބުރަ އުފުލަންޖެހޭނީ ކޮން ފަރާތަކުންތޯއާއި، ޙާޟިރީގެ ކޮޕީއާއި އިންޒާރުގެ ލިޔުންތައް ހޯދައި ރެކޯޑު އިޞްލާޙުކުރުމަށް މުވައްޒަފަށް ޙައްޤު ލިބޭތޯއާއި، ސިވިލް ކޯޓުން ނިންމީ ދަޢުވާގައި އެދިފައިވާ ކަންކަމުގެ މައްޗަށްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަށުކޯޓުން ނިންމީ ދަޢުވާގައި އެދިފައިވާ ކަންކަމުގެ މައްޗަށެވެ. ވަކިކުރި ސަބަބާއި އެ ސަބަބު އެކަށީގެންވާކަން ސާބިތުކުރުމުގެ ބުރަ ވަޒީފާދޭ ފަރާތުގެ މައްޗަށް އޮތުމާއެކު، ވަކިކުރުމުގެ ކުރިން އެއްވެސް އިންޒާރެއް ދިންކަން ކުންފުނިން ސާބިތުނުކުރާތީ، ލިޔުންތައް ހޯދައި ރެކޯޑު އިޞްލާޙުކުރުމުގެ ޙައްޤު މުވައްޒަފަށް ލިބެއެވެ.