2015/HC-A/124

ކްރިމިނަލް ކޯޓުން، ތަކެތީގެ ޒިންމާ ނަގަންޖެހޭ އެހެން ފަރާތެއް ނުދެއްކޭތީ ޒިންމާ ނަގަންޖެހޭނީ އޭނާ ކަމަށް ކަނޑައަޅައި، ޤާނޫނުއަސާސީގެ 59 ވަނަ މާއްދާގެ (ހ) އަށް ރިޢާޔަތްކޮށް ޤާނޫނު ނަންބަރު 2011/17 ގެ 108 ވަނަ މާއްދާގެ (ހ) ގެ ދަށުން ކެނަބިހުން މުޢާމަލާތްކުރުމުގެ ކުށުން ކުށްވެރިކޮށް 15 އަހަރު ޖަލަށްލުމާއިއެކު 25,000 ރުފިޔާ ޖޫރިމަނާކުރުމަށް ޙުކުމްކުރިއެވެ.

ކޯޓު އަމުރެއްގެ ދަށުން މުޙައްމަދު ބައްސާމު ދިރިއުޅޭ އެޕާޓްމަންޓް ފުލުހުން ބަލައި ފާސްކުރިއިރު، އެތަނުގެ ކޮޓަރިއެއްގައި ހުރި ޓީވީ ރެކެއްގެ ތެރެއިން ކެނަބިސް ހުރި 50 ސެލޯފިންކޮޅާއި ކަޓަރަކާއި ފިލްމު ހުސްކުރި ދަޅެއް ފެނުނެވެ. ބަލައި ފާސްކުރިއިރު އެތަނުގައި ހުރީ ހަމައެކަނި އޭނާ ކަމަށާއި، އެ ތަކެތި އޭނާގެ ނޫން ކަމަށާއި އެ ކޮޓަރީގައި އެހެން މީހަކު ދިރިއުޅޭ ކަމަށް ބުނި ނަމަވެސް އެމީހަކީ ކާކުކަން ބުނެފައެއް ނުވެއެވެ.

އިސްތިއުނާފުކުރި ފަރާތުން ބުނީ ދަޢުވާއަށް އިންކާރުކޮށް ދެއްކި ވާހަކަތަކަށް ރިޢާޔަތް ނުކުރާ ކަމަށާއި، ހިޔާޒަތު ކަނޑައަޅާފައިވަނީ 2010/SC-A/24 ގައި ކަނޑައެޅި އުޞޫލާ ޚިލާފަށް ކަމަށާއި، ހެކި ވަޒަންކުރި ގޮތް ރަނގަޅުނޫން ކަމަށާއި، ޗެއިން އޮފް ކަސްޓަޑީ ބްރޭކްވެފައިވާ ކަމަށާއި، ފުރިހަމަނުވާ ތަޙްޤީޤެއްގެ މައްޗަށް ޙުކުމްކޮށްފައިވާ ކަމަށެވެ. ދައުލަތުގެ ވާހަކަ ޙުކުމުގައި ވަކިން ބަޔާންކޮށްފައެއް ނުވެއެވެ.

ތުހުމަތުކުރެވޭ ފަރާތް ދިރިއުޅޭ ތަނުގެ ކޮޓަރިއެއްގެ ތެރެއިން ފެނުނު މަސްތުވާތަކެތީގެ ޒިންމާ (ހިޔާޒަތު) އޭނާގެ މައްޗަށް ކަނޑައަޅައި، ވާޤިޢާ ހިނގިއިރު ޢަމަލުކުރަމުންދިޔަ ޤާނޫނު ނަންބަރު 77/17 ގެ ބަދަލުގައި ޤާނޫނު ނަންބަރު 2011/17 ގެ 108 ވަނަ މާއްދާގެ ދަށުން ކެނަބިހުން މުޢާމަލާތްކުރުމުގެ ކުށުން ކުށްވެރިކޮށް އަދަބު ދިނުމަކީ ޝަރުޢީ އަދި ޤާނޫނީ ހަމަތަކާ އެއްގޮތަށް ކުރެވިފައިވާ ކަމެއްތޯ؛ އަދި ދަށުކޯޓުން ހެކި ވަޒަންކުރި ގޮތް ރަނގަޅުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

މަސްތުވާތަކެތި ފެނުނީ އިސްތިއުނާފުކުރި ފަރާތުގެ ކޮންޓްރޯލްގެ ދަށުގައިހުރި، އޭނާ ދިރިއުޅޭ އެޕާޓްމަންޓަކުން ކަމަށާއި، އެ ތަކެތީގެ ޒިންމާ އުފުލާނެ އެހެން ފަރާތެއް ދައްކާފައި ނުވާތީ، ހިޔާޒަތާ ބެހޭ ސުޕްރީމް ކޯޓާއި ހައިކޯޓުގެ ސާބިޤާތަކާ އެއްގޮތަށް ޒިންމާ އުފުލަންޖެހޭނީ ތަނުގެ ކޮންޓްރޯލް އޮތް ފަރާތް ކަމަށް ކޯޓު ކަނޑައެޅިއެވެ. ވާޤިޢާއަށްފަހު ފާސްވި ޤާނޫނު ނަންބަރު 2011/17 ގެ ދަށުން ދީފައިވަނީ ލުއި އަދަބުކަމަށް ބަލައި ދަށުކޯޓުގެ ޙުކުމް ޤާއިމްކުރިއެވެ.