ބްލެކް ހޯކް ޕްރައިވެޓް ލިމިޓެޑް ވ. ޢަބްދުއްރަޙްމާން މޫސާ

ވަޒީފާއާބެހޭ ޓްރައިބިއުނަލުން ވަކިކުރުމަކީ އަންފެއަރ ޑިސްމިސަލްއެއް ކަމަށް ކަނޑައަޅައި، ވަޒީފާއަށް ރުޖޫޢަކުރުމާއި ވަކިކުރި ތާރީޚުން ފެށިގެން މުސާރައާއި ޢިނާޔަތް ދިނުމަށް ނިންމިއެވެ.

ސެކިއުރިޓީ އޮފިސަރެއްގެ ގޮތުގައި ވަޒީފާ އަދާކުރަމުން ދިޔަ މުވައްޒަފަކަށް ނޯޓިސް ނުދީ، ލިޔުމަކުން ނާންގައި، ވަކި އެއްޗެއް އަންގަންދެން ޑިއުޓީއަށް ނައުމަށާއި ޔުނިފޯމު ޙަވާލުކުރަން މެނޭޖިންގ ޑިރެކްޓަރު އަނގަބަހުން އެންގިއެވެ؛ ކުންފުނިން ބުނީ ހުއްދަނުހޯދައި ޑިއުޓީ ސައިޓު ދޫކޮށްދިޔުމުން ވަކިކުރީ ކަމަށެވެ.

ކުންފުނިން ބުނީ ހުށަހެޅި ހެކި ލިޔުންތަކަށް ރިޢާޔަތްނުކޮށް ނިންމި ކަމަށާއި ނޯޓިސް ނުދީ ވަކިކުރެވޭނެ ސަބަބެއް އޮތް ކަމަށާއި އިތުބާރު ގެއްލިފައިވާތީ ރުޖޫޢަކުރުން ޙައްލެއް ނޫންކަމަށެވެ؛ މުވައްޒަފު ބުނީ ވަކިކުރީ ޤާނޫނާ ޚިލާފަށް ކަމަށެވެ.

ސެކިއުރިޓީ އޮފިސަރަކު ނޯޓިސް ނުދީ ވަޒީފާއިން ވަކިކުރުމުގައި މައުޟޫޢީ އަދި އިޖުރާއީ ޢަދުލުވެރިކަން ޤާއިމުކޮށްފައިނުވާކަމަށާއި ވަޒީފާއަށް އަނބުރާ ރުޖޫޢަކުރުމަށް ވަޒީފާއާބެހޭ ޓްރައިބިއުނަލުން ނިންމުން ރަނގަޅުތޯ.

އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ޓްރައިބިއުނަލުން ހެކިބަސް ނަގައި ލިޔުންތަކަށް ރިޢާޔަތްކޮށްފައިވެއެވެ؛ ވަކިކުރި ސަބަބު ސާބިތުކުރާ ހެއްކެއް ނެތުމާއި ތަޙްޤީޤެއް ނުކޮށް ދިފާޢުގެ ފުރުޞަތު ނުދިނުމުން މައުޟޫޢީ އަދި އިޖުރާއީ ޢަދުލުވެރިކަން ޤާއިމުވެފައިނުވާތީ ޓްރައިބިއުނަލުގެ ނިންމުން ރަނގަޅެވެ.