އަޙްމަދު ޝިޔާޛް ނަޢީމް ވ. ބޭންކް އޮފް މޯލްޑިވްސް

ވަޒީފާއާބެހޭ ޓްރައިބިއުނަލުން ނިންމީ ނޯޓިސް ނުދީ ވަކިކުރެވޭ ޙާލަތެއް ނޫނަސް، ކުރިން އިޞްލާޙީ ފިޔަވަޅު އަޅައި އިންޒާރު ދީފައިވާތީ ވަކިކުރުމަށް އެކަށީގެންވާ ސަބަބެއް އޮތްކަމަށާއި، 2 މަސްދުވަހުގެ ނޯޓިހުގެ ބަދަލުގައި 23,210 ރުފިޔާ ދިނުމަށެވެ.

ބޭންކް އޮފް މޯލްޑިވްސްގެ ތިނަދޫ ބްރާންޗްގެ އެސިސްޓަންޓެއް، ލުއި ލޯނެއްގެ އެޕްލިކޭޝަން ބޭންކަށް ލިބުމުގެ ކުރިން، ސުޕަވައިޒަރަށް ނޭނގި، ޙަޤީޤަތާ ޚިލާފު މަޢުލޫމާތު ހިމެނޭ ލޯން އިންސްޕެކްޝަން ރިޕޯޓުތައް ހެދުމުގައި ބައިވެރިވުމާއި، ކުރިން ގިނަ އިންޒާރު ލިބިފައިވުމާ ގުޅިގެން ނޯޓިސް ނުދީ ވަޒީފާއިން ވަކިކުރެވުނެވެ.

އިސްތިއުނާފުކުރި މުވައްޒަފު ބުނީ، ބޭންކަށް ތުހުމަތު ސާބިތުނުކުރެވި ވަކިކުރުން ރަނގަޅުކަމަށް ނިންމީ ސާބިތުކުރުމުގެ ޒިންމާއާ ބެހޭ މާއްދާއާ ޚިލާފަށް ކަމަށާއި، ބޭންކަށް ގެއްލުމެއް ނުލިބޭ ކަމަކަށްޓަކައި ވަކިކުރުމަކީ ޤާނޫނާ ޚިލާފު ކަމެއް ކަމަށެވެ. ބޭންކުން ބުނީ ނޯޓިސް ދީގެން ވަކިކުރެވޭނެ އެކަށީގެންވާ ސަބަބު ސާބިތުކުރެވިފައިވާ ކަމަށެވެ.

ބޭންކް އޮފް މޯލްޑިވްސްގެ މުވައްޒަފަކު ނޯޓިސް ނުދީ ވަޒީފާއިން ވަކިކުރުން ނޯޓިސް ނުދީ ވަކިކުރެވޭ ޙާލަތެއް ކަމަށް ސާބިތު ނުވިނަމަވެސް، ނޯޓިހުގެ ބަދަލު ދިނުމަށްފަހު ވަކިކުރުމަށް އެކަށީގެންވާ ސަބަބެއް އޮތްކަމަށް ޓްރައިބިއުނަލުން ނިންމުމަކީ ވަޒީފާއާބެހޭ ޤާނޫނާ އެއްގޮތްވާ ނިންމުމެއްތޯ؛ އަދި ވަކިކުރުމުގައި މައުޟޫޢީ އަދި އިޖްރާއީ ޢަދުލުވެރިކަން ޤާއިމްވެފައިވޭތޯ.

އިސްތިއުނާފު ބާޠިލް، ޓްރައިބިއުނަލުގެ ނިންމުން ޤާއިމް

ޙަޤީޤަތާ ޚިލާފު މަޢުލޫމާތު ހިމެނޭ ރިޕޯޓު ހުށަހެޅުމާއި ބޭންކުގެ އުޞޫލުތަކާ ޚިލާފުވުމަކީ އިތުބާރު ގެއްލޭ، ވަކިކުރުމަށް އެކަށީގެންވާ ސަބަބެކެވެ. ދިފާޢުގެ ފުރުޞަތު ދީފައިވާތީ އިޖްރާއީ ޢަދުލުވެރިކަން ޤާއިމްވެ، ކުރީގެ އިންޒާރުތަކަށް ރިޢާޔަތްކޮށްފައިވާތީ މައުޟޫޢީ ޢަދުލުވެރިކަންވެސް ޤާއިމްވެއެވެ. ނޯޓިހުގެ ބަދަލު ދީ ވަކިކުރުން ދެމެހެއްޓުމަކީ ޢަދުލުވެރި ނިންމުމެކެވެ.