އަޙްމަދު މުޙްސިން ވ. މިނިސްޓްރީ އޮފް ފިނޭންސް

ސިވިލް ކޯޓުން ނިންމީ 67,500 ރުފިޔާއަކީ ދައުލަތަށް އަނބުރާ ލިބެންވާ ފައިސާކަމަށާއި، އެ ފައިސާ 2 މަސްދުވަހުގެ ތެރޭގައި ދައްކަން އެންގުމަށެވެ.

މޯލްޑިވްސް މީޑިއާ ކައުންސިލުގެ މެންބަރުން ނިންމައިގެން 2011 ވަނަ އަހަރު 9 މަސްދުވަހަށް މަހަކު 7,500 ރުފިޔާގެ ލިވިންގ އެލަވަންސް (ޖުމްލަ 67,500 ރުފިޔާ) އިސްތިއުނާފުކުރި މެންބަރަށް ލިބުމުން، އެ ފައިސާ ޤާނޫނާ ޚިލާފަށް ނެގި ފައިސާއެއްކަމަށް ބުނެ ދައުލަތުން ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، މީޑިއާ ކައުންސިލް ޤާނޫނުގެ 29 (ހ) ގެ ޙިމާޔަތާއި މޯލްޑިވްސް މީޑިއާ ކައުންސިލުގެ ޤާނޫނުގެ 3 ވަނަ މާއްދާ (ވަކި ޝަޚްޞިއްޔަތު) އާ ޚިލާފަށް ނިންމި ކަމަށާއި، ޤަވާޢިދުގެ 4.06 ތަޠްބީޤުކުރުން ގޯސްކަމަށާއި، މެންބަރުންގެ އުޖޫރަ އުނިނުކުރެވޭނެކަމަށެވެ. ދައުލަތުން ބުނީ މިއީ ޤާނޫނާ ޚިލާފަށް ލިބުނު ފައިސާ އަނބުރާ ހޯދުން ކަމަށެވެ.

މޯލްޑިވްސް މީޑިއާ ކައުންސިލުގެ މެންބަރުން އަމިއްލައަށް ނިންމައިގެން ނެގި ލިވިންގ އެލަވަންސް، ޤާނޫނާއި ޤަވާޢިދާ ޚިލާފަށް ލިބިފައިވާ ފައިސާއެއްގެ ގޮތުގައި ދައުލަތުން މެންބަރެއްގެ އަތުން އަނބުރާ ހޯދިދާނެތޯ؛ މީޑިއާ ކައުންސިލް ޤާނޫނުގެ 29 (ހ) ގެ ޙިމާޔަތާއި ކައުންސިލުގެ ވަކި ޝަޚްޞިއްޔަތު އެކަމަށް ހުރަހަކަށްވޭތޯ.

އިސްތިއުނާފު ބާޠިލު، ސިވިލް ކޯޓުގެ ޙުކުމް ޤާއިމް

ލިވިންގ އެލަވަންސަކީ ރައްޔިތުންގެ މަޖިލީހުން ކަނޑައަޅާފައިވާ މުސާރައިގައި ނުހިމެނޭ ފައިސާއެއްކަމާއި، ކައުންސިލަށް ދައުލަތުގެ ފައިސާ ޚަރަދުކުރުމަށް ނިންމުމުގެ ބާރު ނެތްކަމާއި، މާލިއްޔަތު މިނިސްޓްރީގެ ހުއްދަ ނުހޯދާކަމާއި، 29 (ހ) ގެ ޙިމާޔަތް މިކަމަށް ނުލިބޭކަމާއި، ނިންމުމުގައި އިސްތިއުނާފުކުރި ފަރާތް ބައިވެރިވެފައިވާކަމެވެ.