އަޙްމަދު މަނާޞް ވ. ޢާއިޝަތު ޝަނީމާ

ފުވައްމުލަކު މެޖިސްޓްރޭޓް ކޯޓުން، ރަން ދީފައިވާކަން ސާބިތުނުވާތީ 300،000 ރުފިޔާ 12 މަސްދުވަހުގެ ތެރޭގައި ދައްކަން ފިރިމީހާގެ ޣައިރު ޙާޟިރުގައި ޙުކުމްކުރިއެވެ.

އިސްތިއުނާފުކުރި ފަރާތާއި އިސްތިއުނާފު ރައްދުވި ފަރާތުގެ ކައިވެނީގެ ރަނުގެ ގޮތުގައި 300،000 ރުފިޔާ ކަނޑައެޅިފައިވާއިރު، ވަރިވިއިރުވެސް އެފައިސާ ދީފައިނުވާކަމަށް ބުނެ އަނބިމީހާ ދަޢުވާކުރިއެވެ. ފިރިމީހާ ބުނީ އަނބިމީހާގެ މަންމަގެ ބޭސްފަރުވާއަށް ޚަރަދުކޮށް ރަން ދީފައިވާ ކަމަށެވެ.

އިސްތިއުނާފުކުރި ފަރާތުން ބުނީ، އޭނާގެ ޣައިރު ޙާޟިރުގައި ޙުކުމްކުރި ކަމަށާއި، ރަން ދީފައިވާކަން ސާބިތުކުރުމަށް ހެކި ހުށަހެޅުމާއި ހުވާކުރުމުގެ ފުރުޞަތު ނުދިން ކަމަށާއި، ކައިވެނީގެ ފޯމުގައި ޢަދަދު ޖަހާފައިވަނީ އޭނާއަށް ނޭނގި ކަމަށެވެ.

ކައިވެނީގެ ރަނުގެ ގޮތުގައި ކަނޑައެޅި 300،000 ރުފިޔާ ފިރިމީހާ ދީފައިވާކަން ސާބިތުނުވާތީ އެފައިސާ ދޭންޖެހޭކަމަށް ދަށުކޯޓުން ކަނޑައެޅުމަކީ ރަނގަޅު ނިންމުމެއްތޯއާއި، އިސްތިއުނާފުކުރި ފަރާތުގެ ޣައިރު ޙާޟިރުގައި ޙުކުމްކުރުމާއި ހެކި ހުށަހެޅުމުގެ ފުރުޞަތާ ގުޅޭ ނުކުތާތައް.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ކައިވެނީގެ ފޯމާއި ސެޓްފިކެޓުން ރަނުގެ ޢަދަދު ސާބިތުވާކަމާއި، ފިރިމީހާ ފާހަގަކުރި ކައިވެނީގެ ހެކިންނާއި ވަލީވެރިޔާވެސް ރަން ދިންކަމަށް ހެކިނުދޭކަމާއި، ދަށުކޯޓުގައި އިތުރު ހެކިންނަށް އެދިފައިނުވާކަމާއި، ޣައިރު ޙާޟިރުގައި ޙުކުމްކުރީ އަޑުއެހުންތައް ނިމުމަށްފަހު ކޯޓުގެ ހުއްދައާނުލައި ރަށުން ފުރާފައިވާތީ ކަމަށް ބަލައި ދަށުކޯޓުގެ ޙުކުމް ޤާއިމުކުރިއެވެ.