އަޙްމަދު މަމްދޫޙް ވ. ޙަސަން ޝާމް ޢަބްދުﷲ ޝިޔާމް

ސިވިލް ކޯޓުން، ދަޢުވާކުރި ފައިސާގެ ތެރެއިން އެޑްވާންސްގެ 7,500 ރުފިޔާ ދަޢުވާކުރި ފަރާތަށް ލިބެންޖެހޭ ފައިސާކަން ސާބިތުވާކަމަށް ކަނޑައަޅައި، އެ ފައިސާ ދެއްކުމަށް ޙުކުމްކުރިއެވެ.

ވިޔަފާރި ކުރުމަށް ބޭނުންވާ ހުއްދަތައް އޮތްކަމަށް ބުނެ ފިހާރައެއް ކުއްޔަށްދީ ކުލި އާއި އެޑްވާންސްގެ ގޮތުގައި ފައިސާ ނަގައި، ފަހުން ހުއްދަތައް ނެތްކަން އެނގުމުން ފައިސާ އަނބުރާ ނުދިނުމުން، ކުއްޔަށް ހިފި ފަރާތުން 30,000 ރުފިޔާ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، ޚިލާފުވި އެއްބަސްވުމަކީ ކޮބައިކަން ބަލާފައި ނުވާކަމަށާއި، ހުށަހެޅި ސަރުކާރުގެ ލިޔުންތަކަށާއި ހެކިންނަށް ރިޢާޔަތްނުކޮށް، ދަޢުވާކުރި ފަރާތް ހާޟިރުނުކޮށް ޙުކުމްކޮށްފައިވާކަމަށެވެ. ރައްދުވި ފަރާތުން ބުނީ ވާހަކަ ދެކެވުނީ އޭނާގެ މަންމައާ ކަމަށާއި އެއްބަސްވުން ވެފައިވަނީ އޮޅުވާލައިގެން ކަމަށެވެ.

ލިޔުމުން ސޮއިކޮށްފައިނުވާ ކުލީގެ އެއްބަސްވުމެއް ދެފަރާތުގެ މެދުގައި ވުޖޫދުގައި އޮތްތޯއާއި އޭގެ ބައިވެރިންނަކީ ކޮބައިތޯ، އަދި ދަށުކޯޓުން ހުށަހެޅި ޝަފަހީ ހެކިން ހާޟިރުނުކޮށް ލިޔުންތަކަށް ރިޢާޔަތްނުކޮށް އެޑްވާންސް ފައިސާ އަނބުރާ ދިނުމަށް ޙުކުމްކުރުން ރަނގަޅުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ފައިސާ ޙަވާލުކުރި ލިޔުމުން ވިޔަފާރީގެ ކުލީގެ އެއްބަސްވުމެއް ވެފައިވާކަން ސާފުކަމާއި، ހެކިން ހާޟިރުކުރުން ލާޒިމްނުވާކަމާއި، ލިޔުންތަކަށް ރިޢާޔަތްނުކުރިކަމަށް ނުބުނެވޭކަމާއި، އެޑްވާންސް ފައިސާއާ ބެހޭ ނިންމުން ގޯސްވާ ސަބަބެއް ދައްކައިދެވިފައިނުވާތީ ދަށުކޯޓުގެ ޙުކުމް ޤާއިމްކުރިއެވެ.